2800/2024-2025
Dated Aizawl, the 1st November, 2024: Vawiin khan Chief Minister Pu Lalduhoma chuan Aijal Club McCabe Hall ah National Livestock Missions leh Handholding Scheme kal dunna tur (convergence) a hawng.
Pu C. Lalsawivunga, AH & Vety Minister chu khual zahawm a ni a, Pu Lalthansanga, Fisheries Minister leh Dr. Kenneth Chawngliana, Vice Chairman, Planning Board te pawhin a telpui.
Pu Lalduhoma chuan, kan ram hian bung thar kan kai mek a, a thlawna sem emaw dawn emaw rilru kalsanin, thawhrimna zawk hmanga din chhuah tumin ke kan pen mek. Handholding Scheme hian mi taimate lam a hawi a. Chutiang mite tana buatsaih chu a ni. AH & Vety hmalakna lamah hian Covid19 leh ASF rawn len hma khan Agriculture & Allied sector a kan thawhchhuah zawng zawng zaa 45 hi AH & Vety atanga thawhchhuah a ni a. Hripui len hnu 2021 ah chuan zaa 23 ah a tlahniam a. Chu kan tlak hniamna atanga kan chuan chhuah leh theih nan tuna kan convergence hi a tangkai hle ang. Handholding thawhpui (partner) diltu kan tam tawh hle a, a lawmawm hle. Nimahsela, kuminah hian pilot phase ang chauhvin kan la kal a ni tih mipuiten min hriatsak se kan duh. Nakkum atangin lian zawkin kan kal tan chauh ang. Component pakhat zawk CM Special Package dilna thehluhna hmun Chief Minister Office hi a diltute tana pan a harsat avangin district tina DC Office-ah thehluh theih turin ruahmanna kan siam ta bawk, a ti.
National Livestock Missions hi project cost zatve (50 %) sawrkar laipuiin a rawn tum a, a chhawrtu (partner) ten total expenditure atanga zaa sawm (10%) an tum a. A bak sum leh pai mamawh dang zawng chu loan atanga hmuh tur a ni. He loan-ah tak hian a chhawrtute hian harsatna an tawk ta thin a. An harsatna tawhna lai tak hi Handholding hmangin sawrkarin a pui ve thung ang a. Loan la turte tan sawrkar chu guarantor-ah a tang ang a, loan an rulh that chuan loan pung (interest) kha kan subsidy leh ang. A rul tha lote chungchang erawh kan sawi tel thei lo. Tichuan, a chhawrtute tana scheme tha leh duhawm takah a lo chang ang, a ti.
Ran vulh kan sawi rualin sa processing lam pawh kan ngaihtuah thlen a ngai a. Meat processing industry hi Handholding Scheme-ah kan telh thar dawn a. Kan thalai, hetiang lama theihna neite tan remchang a inhawng dawn a ni. Ranvulhtute tan Animal Insurance scheme tha tak kan neih a ngai a. NLM hnuaia Animal Insurance Scheme kalpui thinah state sawrkar sum thawh tur hi zaa sawmthum (30%) a ni thin a. Keini ang state pachhe tan chuan a sang lutuk a, kan tlin ngang lova. Central sawrkarah min tihhniamsak turin kan ngen a. Tunah chuan zaa sawm (10%) ah min rawn siamsak ta a ni, a ti.
AH & Vety department-a thawktute hian kan ranvulhtute hi an hmangaih tak zet a ni tih hi mitin ka hmu a. Sawrkar scheme tihlawhtling turin an inpe hle tih kan hria a. Ka lawm em em a, ranvulhtute pawh in vannei ka ti hle a ni, a ti.
Pu C. Lalsawivunga, AH & Vety Minister pawhin thusawiin, sa, bawnghnute leh artui lamah kan intodelh lo hle a. Bawnghnute hi litre nuaih 76 zet nikum chhung khan kan chawlut a, ranchaw pawh hi kum khat chhungin Rs. 77 Crore man zet kan lalut a ni. Kan sum thawh chhuah ve chhun chhun te hi state pawnah a luang chhuak nasa a, a uiawm thin hle. Kan dan chah theih dan awm chhun chu thar chhuah ve hi a ni. Chumi kawngah chuan vawiina kan tlangzarh convergence scheme hi a tangkai hle ang, tiin National Livestock Missions kalpui dan tlangpui leh Handholding nena kalkawp remchang tak a nih dan te pawh a tarlang.
National Livestock Missions hi Vawkpui vulh te, Kel vulh te, Ar awpkeuna leh ranchaw siamna lam tea lian tham taka hmalakna tur scheme a ni a. Tanpuina sum pawh a tam tham hle. Tunah hian North East state zingah Mizoram chu NLM a ti tha ber niin, he scheme kaltlang hian mi 76 in loan an la tawh a, mi 31 in subsidy an hmu tawh a, mi 21 lai mai subsidy hmu leh tura peih fel an ni.
A hawnna inkhawmah hian Dr. Zothanmawii, Director, AH & Vety, chuan kalkhawmte lawmna thu a sawi a, Pu C. Lalrambuatsaiha, Rainbow Piggery Farm neituin a hmalak dan chanchin sawina neiin, Dr. Vanlalhruaia, Jt. Director, AH & Vety Deptt chuan lawmthu sawiin inkhawm a khar a ni.
