2801/2024-2025
Dated Aizawl, the 1st November, 2024: Vawiin khan Chief Minister Pu Lalduhoma chuan Zo Inspiration Foundation ten an tanpuite nena intawhkhawm hmasa ber, Verdant Multipurpose Hall, Laipuitlanga an buatsaih chu a telpui.
Thusawiin Chief Minister chuan, Zo Inspiration Foundation rawngbawlna video chiang zawkin ka han en a, ka te chem chemin ka inhria. In hnathawh ropui tak hian min tichak a ni. Sawrkar dan hnuaia foundation tha taka a chang ta hi a lawmawm ka ti a. Thui lehzual in kal thei dawn a, mi tlawmngaite thawhlawmah chauh innghat lovin CSR thlengin in dap ve thei tawh dawn a ni. Mihringte hian kan pian hmaa mite rawng kan bawlsak thei lo va, kan thih hnua thangthar lo awm zel te rawng pawh taksain kan bawl thei tawh lo. Kan damrualpuite rawng chauh hi kan bawl thei a ni. Israel lal ropui Davida pawh kha "A damrualpuite rawng a bawl zawhin a thi ta" tiin Bible chuan a ziak fel thlap mai a. Kam damrualpuite rawngbawlsak hna hi hna ropui ber chu a ni. He foundation pawh hian chu hna chu in thawk a, nangmahni kaltlanga thilpek petute zawng zawng pawhin chu hna chu an thawk a ni. Rawngbawlna peng hrang hrang a awm a, kan hnathawh theuh hi rawngbawlna a ni. Tha taka hlentu nih tumin i bei ang u.
Mi harsate tanpuina thilpek, CM RF hi mi inphalte rawn chhunluh tlingkhawm atangin kan pe chhuak ve reng a. Hun reilote chhungin thilpek kan dawng nasa a, kan pe chhuak reng bawk a. Pe chhuak nasa pawh kan inti ve viau a ni. Nimahsela, CM RF ai maha nasain nangnin hma in lo la. Thawhho theihna tam tak kan neih a rinawm. Chak tak leh huai takin lo kal zel ula, in hmaah kawng bumboh a awm fovang tih ka hria. Pathian min hruaina kawngte hi kawng zal nuam a ni vek lo va, tawrh a tul chang pawh a awm. A pal tlang thei turin chakna min pe a, a tawpah rah duhawm tak min daksak thin tih lo hrereng ang che u. Tanpui ngaite tan, Zofate hming timawitu atan he foundation kal zel turin duhsakna ka hlan a ni, a ti.
Major Jerry Lalrozama chuan hunserh a hmang a, Dr. Zoramthanga, Chairman, Zo Inspiration Foundation chuan kal khawmte lawmna thu sawiin, Tv. Vanlalhmachhuana, Asst. Secy chuan report a pe a. Founder Emmanuel Thangrosanga chuan he foundation lo pian chhuah dan leh an hnathawh tlangpui a tarlang.
Zo Inspiration kaltlanga tanpuina dawngtute pawhin thusawina an nei bawk.
Zo Inspiration hi kum 2020 March thla vel atang khan Tv. Emmanuel Thangrosanga chuan youtube channel hmangin bul a tan a. Foundation din tan ni atan 7th June, 2020 chu hman a ni. June ni 22, 2020 atangin Samtlang Quarry chim vanga nunna chan Tv. Lalhruaizela kalsan tak, a chhungte chhawmdawlna thilpek, mi inphalte kaltlangin a dawng ta a. Hei hi mi harsa leh tanpui ngaite tanpuina lama a bul tanna a ni. Emmanuel Thangrosanga hian a hnathawh mek, zirtirtu hna bansanin he lama hmalakna hi hun pumin a kalpui ta a ni. Vawiin thleng vehbur tum 85 an khawn tawh a, chuta tanga thilpek tlingkhawm chu Rs. 300 lakh chuang a ni. Heng sum hmang hian chenna in thar emaw chei that 18 an nei tawh a, mi harsate eizawnna tur eichawp dawr 3 an pe tawh a, zirlai naupang sponsor 26 an nei mek. Heng bakah hian thilpek tam tak an sem chhuak tawh a ni. Kumin March ni 15 khan Society Registration an nei a, mumal leh fel fai takin an inenkawl a, office hi Ramhlun Venglaiah neiin thawktu pariat an awm a ni.
