Vawiin chawhma khan Aijal Club-a National Seminar on Bengal and North Eastern Region Green Innovators and Social Entrepreneurs (BANERGISE) neih chu Chief Minister Pu Zoramthanga chuan khuallian niin a hawng. He seminar hi MSME (Micro, Small and Medium Enterprises) Development Institute, Kolkata leh Br. MSME Development Institute, Aizawl tangkawp in an buatsaih niin, India hmarchhak state-te tihhmasawnt nana entrepreneur te puih a thuamchak kawnga hmalakna a ni.

Chief Minister chuan Mizoram tan MSME chu hmasawnna atan kawng pawimawh tak a nih thu a sawi a. Mizoram chu Agro-forest based industries tha tak nei thei a nih thu sawiin, chumi atan chuan “raw material khawiah nge kan hmuh ang, engtin nge kan phurh kual ang, engtin nge kan siam ang a, engtin nge kan zawrh ang tih pali chu kan chian phawt a tul a ni” a ti. Thil tharchhuah leh siamchhuah thahnem tak nei mah ila a hralhna tur hriatloh emaw market lamah ruahmanna mumal siam a nih loh chuan hlawhchhamna a thlen thu a sawi. Chief Minister chuan tun dinhmunah sawrkar hna ringawtin Mizo thalaite a daih tawhlo thu leh company ah te, entrepreneurship lamah tam tak chuan an rilru an pek tawh thu te, ram changkang zawkah pawh chu chu thalaite tuina a nih thu a sawi a. Mizoramah pawh heng kan agro-forest resource behchhan hian entrepreneurship lama thui tak kal theihna tham a awm thu Pu Zoramthanga chuan sawiin, pawimawh hmasa zawk chu a kal dan tur ah chian hmasak a, a thu ringawt lovin a practical a kalpui dan tur hriat a tul a ni, tiin vawiin seminar chu hlawkpui taka an hman a beisei thu a sawi.

He hunah hian DC&MA Secretary Pu Rodney L. Ralte, Planning Secretary Dr. C. Vanlalramsanga leh RBI Aizawl General Manager Pi Mary L. Deng te chu khualzahawm a sawm tel an ni a. Pu Rodney L. Ralte chuan BANERGISE seminar chuan thui takin Mizo entrepreneur leh entrepreneurship a tui te tan zau zawk a inphochhuah theihna tur remchanna te siamin saka marketing lama hmasawnna thlen ngei a beisei thu a sawi a.

Dr. C. Vanlalramsanga chuan thu a sawi naah entrepreneurship chu tunlai khawvelah ram hmasawnna atana pawimawh ber zing ami a nih thu te, Mizoramah pawh sawrkar hmalakna in Entrepreneurship Development Scheme kalpuiin chumi atang chuan inelena te buatsaihin, thui takin entrepreneurship in hma sawn phah in, nikum khan India Today state survey chuan entrepreneurship lamah Mizoram chu "Most Improving State" ah a thlan thu te a tarlang a. Mizoram chu entrepreneur te hmalakna enzui tura ruahmanna, monitoring mechanism India rama sawrkar hmalakna anga siam hmasa ber tu a nih thu a sawi bawk.

Pi Mary L. Deng chuan MSDE te chu Mizoram tan sum lakluhna pawimah an nih thu leh, service sector chu Mizoram GSDP hnuaia sum hailuttu pawimawh ber a nih thu leh 25% chu manufacturing industry atang a nih thu a sawi a. Entrepreneurship in hma a sawn dawn chuan finance - bultanna tur sum a pawimawh thu leh chumi atan chuan bank an pawimawh thu sawiin, hemi atan hian scheme hrang hrang pawh siam a nih thu a sawi a. Entrepreneur ten awlai zawka sum puk a nih theih nan te ruahmanna siam ni thin mahse a puktu te lam ten an hriat chian loh vang te, branch thenkhatin an hriat fuh tawkloh avang te a heng hmalakna te hian hlawhtlinna duh anga hmuh tur a awm loh thin thu te a sawiin, hemi kawngah hian nasa zawk a hmalak pawimawh a tih thu a sawi a ni.

Seminar hawnna inkhawm hi MSME DI, Kolkata Director Pu Ajoy Bandopadhyay chuan kaihruaiin, Pu R. Zapliana, Asst Director, Br. MSME-DI, Aizawl chuan lawmthu sawiin hun a khar a. Seminar zawh hian khuallian chuan stall hrang hrangte a tlawh a. Chawhnu lamah technical session in chhunzawm a ni.