Vawiin khan Tourism Minister Pu Robert Romawia Royte hovin ama office chamber-ah State Level Organising Committee for Anthurium Festival 2019 an thukhawm a. Vawiin meeting-ah hian ni hnih - October ni 4 & 5 - chhunga neih tur Anthurium Festival hmandan tur (programme) an duang fel bakah Festival kaihhnawih thil pawimawh dangte an sawiho.

State Level Organising Committee Meeting kaihruaitu Pu Robert Romawia Royte chuan kum 2 hnuah Anthurium Festival hi neih leh tur a nih avangin a phurawmin a hma aia nasa takin tanlak a ngai dawn a, mipuite rilruah Anthurium Festival hming lo dai tan tawh chawh nun leh a nih theih nan theihtawp chhuah turin Committee Member-te leh a kaihhnawih Department hrang hrangte a sawm a. Kumdangah pawh Reiek Tourist Resort hmunah tho hian Anthurium Festival nghah thin a ni a, he sorkar hmalaknaah Reiek khawtlang hruaitute leh mipuite thlawpna leh inpekna a chhuanawm hle thin a ni a ti a. ‘Anthurium Festival’ a nih ang takin Anthurium par chi hrang hrang hmangin a hmun pawh chei a ni thin a, state pawn atanga Festival chhim tura lo kal ten Mizoram atanga thil tharchhuahte zinga Mizote hlawhtlinna ber pakhat anthurium par mawizia te rawn hmuin, pangpar lama sumdawngte pawhin nasa takin an hlawkpui phah thin avangin heng pangparte hi tihchhiat emaw a ruka phawichhuak lovin Festival tawp thlengin a chhimtu mipui zawng zawngten duat tak leh fimkhur takin enkawl thiam ila, a hmunhma pawh fai takin kalsan a, bawlhhlawh paih mai mai lo turin fimkhur a pawimawh hle a ni Minister chuan a ti.

Anthurium Festival 2019 hi ni hnih chhung hman a ni dawn a. A tan ni October ni 4-ah Tourism Minister Pu Robert Romawia Royte chu Khuallian a ni ang a, a tuk ni hnihna October 5-ah Mizoram Chief Minister Khuallian turin beisei a ni a. Mizo zaithiam lar tak takte, Mizo hnam lam hrang hrangte, Costume Parade, Fashion Show bakah food court, KVI stalls, airgun shooting, Mizo incheina nena thlalak theihna tur photo booth, Reiek tlangchhip thlenga kea kalna tur trekking te, naupang lam leh Fire Department ten display neih an tum bawk a. Reserve Bank of India pawhin Festival ni hnih chhungin mipuite tan dawr theihin a hmunah an inhawng dawn a, pawisa note leh pawisa nawi (coins) hluite a duh atan thleng theih a ni ang.

Vawiin Meeting-ah hian Sports, Youth Affairs & Tourism Board Vice-Chairman Pu T.C.Pachhunga, Tourism Commissioner & Secretary Pi Esther Lalruatkimi bakah Festival kaihhnawih sorkar department hrang hrang aiawh official-te, Media hrang hrang te, Zoram Anthurium Growers Society, Mizoram Cultural Organisation leh Reiek khawtlang hruaitute an tel a ni.