Vawiin khan Lunglei DC Office Chamber-ah Tripura Bru Relief Camp  atanga Lunglei District a Bru chhungkaw 364 hruai kir dan tur ngaihtuahin District Level Core Committee an thukhawm. Thutkhawmna ah hian Lunglei DC Pi K. Lalrinzuali, Additional SP Pu Lalchhuanthanga te bakah a kaihhnawih sawrkar Department hotute leh Sub Hqrs YMA hruaitute an tel.

Lunglei District ah hian Bru chhungkaw 364 hruaikir tur niin Khakchangpara camp atangin chhungkaw 3, Hamsapara Camp atangin chhungkaw 2, Naisingpara Camp atangin chhungkaw 54 leh Hazacherra camp atangin chhungkaw 305 an ni. Heng chhungkaw 364 te hi Lunglei District huam chhunga khaw pali- Putlungasih, Chawilung S, Dinthar leh Buknuam ah hruaikir an ni ang. Vawiin meeting-ah hian Relief Camp atanga Lunglei District an rawn pan kawnga motor ruahman dan tur, an ei leh in tur, tui in tur, inthiarna leh Medical facilities leh security arrangement te chipchiar taka sawiho a ni a. Department hrang hrangte sum mawmawh te, kawng dinhmun, kawlphetha dinhmun, damdawi leh medical facility dang mamawh tur te, buhfai lama ruahmanna siam te leh Sawrkar official-te duty dan tur sawiho a ni. 

Lunglei DC Pi K. Lalrinzuali chuan chuan Bru hruai kir hna hi Mizoram sawrkar Home Department –in Road Map a buatsaih angin uluk taka kalpui a nih tur thu sawiin he hna hi hlawhtling taka zawhfel a nih theihnan kalkhawmte te chu theihtawp chhuah theuh turin a chah a. Hemi hna a mawhphurna neite a bik takin Liaison Officer (LO) te chu uluk leh fimkhur taka hna an thawh a tul tur thu a tarlang. Bru chhungkuate hruaikir hna tluang taka a kal theih nan District official leh NGO tangkawp ten theihtawp an chhuah thu sawiin an rawn letna tur khaw pali -  Putlungasih, Chawilung S, Dinthar leh Buknuam ah te Revenue Department-in House Site Plan mumal tak an siam tawh thu a sawi. District Level Core Committee member-te chu an mamawhte inthlahrung lova a hnena thlen vat turin a chah bawk a ni.

August ni 16, 2019 khan Lunglei DC Pi K. Lalrinzuali hovin officials-te leh YMA Sub Hqrs hruaituten Bru laklet na tura inpuahchahna a hmuna tlawhin Dinthar leh Putlungasih anlo tlawh tawh a. Karleh lamah DC ho vek hian Chawilung S leh Buknuam tlawh leh turin ruahmanna siam mek a ni.