Pachhunga University College leh Zoram Medical College (ZMC), Falkawn tangkawp chuan vawiin khan College zirlai, zirtirtu leh College thenawm veng mipuite tan a thlawna inentirna hun ‘Free Clinic’ chu PU College-ah an buatsaih. 

He free clinic hi PUC Health Care Committee bultuma buatsaih a ni a, ZMC atang hian an Director, Prof. L.Fimate hovin doctor paruk ten health check up an nei a. PUC Principal, Dr. Tawnenga, PUC Chief Medical Officer, Dr. Pauline L.Vanchhawng leh Health Care Committee Secretary Dr. G.Deka ten ZMC medical team te hi an lo dawngsawng a. Zirlai, zirtirtu, staff leh college chhehvel veng mipui thahnem tak inentirin, mipuite mamawh angin damdawi pawh a thlawnin an sem nghal bawk a ni.

Pachhunga University College hian zirlai, zirtirtu leh staff zawng zawng tan Medical Doctor an nei a, a thlawna in entir theih reng a ni a, zirlai ten an chhawr tangkai hle. Hetih rual hian hriselna kawnga zau lehzuala ke pen a nih theih nan kumin atangin Health Care Committee din a ni a. He committee hmalakna hian ZMC te nen tangkawpin zirlai leh staff te bakah college thenawm veng te tan a thlawna inentirna (free clinic) hi an buatsaih ta a ni.