Vawiin hian Irrigation and Water Resources, Agriculture, etc., Minister Pu C. Lalrinsanga hovin Biate khaw kiang Tuipuia Leilet thlawh zawhna hun an hmang.

Minister hian zing lamah Bawktlang, Mualcheng leh E. Lungdar te tlawh hmasain an khawtlang hruaitute nena inkawm hona a neih pui hlawm a. Loneituten an mamawh hrang hrang an lo thlen te ngaihthlak sakin heng an dilna te hi a tul ang zela a ngaihtuahpui tur thu a hrilh hlawm. Hemi hnu hian Biate pan lehin Zialung Community Hall ah Biate mipuiten ropui takin an lo hmuak a. An khawtlang mamawh hrang hrangte Minister hnenah hian an lo thlen bawk.

Biatea vantlang inkhawmah hian thusawiin Pu C. Lalrinsanga chuan, Biate chu zoram pum tana khaw entawn tlak, faina leh thianghlimna lama midangte zirtirtu in ni a, in thinlung thianghlimna leh faina hi in tualah a rawn lang chhuak a, khaw ngaisan awm tak in ni, a ti. Helai tlang dung khuate chu Serthlum ching nasa khua in ni a, Serthlum chingtuten kum rei zawk Serthlum an thar theih nan Drip Irrigation kalpui tum niin Project lian tham tak siam a ni. Irrigation hmalakna leh Land Development lam te pawh nasa taka kalpui kan tum a, ei leh bara intodelh hi kan sawrkar thiltum lian ber a nih avangin kuthnathawktute tan ruahmanna tam tak a awm dawn a ni, tiin Biate mipuite a hrilh. Minister chuan, kan ram thlai chin, keimahni ta ngei Mizo Hmarchate leh thlai dangte Geographycal Identification (GI) neih tuma hmalak mek a nih thute, Mizoramin Water Policy tha tak a neih theih nana hmalak mek a nih thute, kan rama thlai natna lo chhuak thin te chemical hmanga bei let lova Biological Control hmanga kan beih let theih nana Laboratory ngaihtuah mek a nih thute a sawi a. Crop Insurance Scheme fel tak kan neih thute, Farmer Pension Scheme thar nei thuai tura hmalak mek a nih thute leh phailama mithiamte nena an inbiakna atangin kan aieng leh sawhthingte hralhna tha tak a awm thei dawn ni a a hriat thute a sawi a ni. Minister hian Biate chu Khawzawl District thara lut tur an nih avangin Civil SDO an lo dil chu dil awm tak nia a hriatpui thu a sawi a, sawrkarin a tul anga ruahmanna tha tak a rawn duan chhuah thuai a beisei thu a hrilh a ni.

Zialung Community Hall a hun a hman zawh hian Tuipui lui phai pan lehin helai vela leilet neitu leh khawtlang hruaitute nen leilet thlawh zawh (lo zawh) na an nei leh a. Biate khaw tana tuilakna tur thawh mek a tlawh nghal bawk. 

Attachment

  • Loading attachment...