564/2023-2024

Aizawl, 24.05.2023: Chief Minister Pu Zoramthanga chuan vawiin khan Bilkhawthlir a PWD Rest House & Chowkidar quarter thar chu hman theihin a hawng. Serlui bialtu MLA Pu Lalrinsanga Ralte pawh a tel a ni.

Chief Minister chuan vawiina Rest House leh a enkawltu chowkidar quarter hawn tak chu tangkai taka hman a nih ngei a beisei thu a sawi a. Kum 2020 March thla a ama hova a sakna tur helai hmun an lo thlithlai tawh dan leh an buaipui chhoh dan sawiin, hripui lengin bumro mahse vawiinah hetiang hun thlen a ni ta chu lawmawm a tih thu a sawi. Chief Minister chuan tun kum engemawzat chhung chu thil chi hrang hrang - hri leng te, lirnghing te, kangmei chhuak, raltlan, ramri buaina leh thil dang dangin Mizoram a nghawng dan a sawi a. Khawvel pum min tibuaitu covid hripui leng khan vawiin thlengin ram ropui zawk pawh harsatna an la tawn phah a; Keini pawh engemawchen chu sum dinhmun khawihin, hmasawnna hna pawh nghawng mahse boruak ziaawm chho zelah theihtawp chhuah zel a nih dan a sawi a. Amaherawhchu history atangin indopui avanga ram tluchhia leh retheih phah te an intundin dan leh hausa taka an insiamchhoh leh dan khan hmu a. Chutiang ang chuan keini pawh tumruhna nen hma la in, dinhmun tha zawk leh sang zawkah kan inhlang thei a ni tih a chiang a, chumi tur chuan kan inbuatsaih a tul thu a sawi a. Hmathlir, vision tha tak neih a pawimawh thu sawiin, ram entawntlaka kan insiam dawn chuan tlachawp taka rorel emaw, tlachawp taka thil tih zel a chi loh thu sawiin, vawiina kalkhawmte pawh mahni hmazawn theuhah an theihtawp chhuah theuh turin a chah a ni.

MLA Pu Lalrinsanga Ralte chuan Bilkhawthlir khua in mikhual thlenna tur changtlung tak a neih theih nan a sawrkar hmalakna chungah lawmthu sawiin, mipui tan a tangkai hle tur thu a sawi a. Bilkhawthlir khaw tana sawrkar in hmalakna a lo neih tawh hrang hrangte sawi bawkin, hmasawnna ruhrel mamawh sawrkara an thlen te chu health lamah a ni emaw, infiamna lamah a ni emaw, electrification leh thildangahte sawrkarin a lo ngaihtuah zel a, tihhlawhtlin a nih thin dan sawiin, heng sawrkar hmalakna te hi a hmangtute'n dimdawi taka enkawl a beisei thu a sawi.

Vawiina Chief Minister in rest house leh quarter a hawn tak hi cheng nuai 412.39 senga sak a ni a. December ni 15, 2020 khan thawh tan niin February ni 28, 2023 khan zawh a ni a. Thawktu chu Pu Lalramsanga, Tanhril a ni. Rest House hi chhawng thum - basement, ground floor leh first floor awmin, total floor area hi 877.97 sqm (Rest house: 797.60 sqm, Chowkidar qrtr: 80.37 sqm) a ni. Basement ah dormitory, choka leh chaw eina/dining area siam niin, ground floor ah ordinary room 8 awmin, first floor ah VIP room 2 leh ordinary room 7 leh lounge dah a ni.

Vawiin rest house hawnna inkhawmah hian Kolasib DC Pu John LT Sanga, SP Kolasib Pu Lalrinawma Traite leh Kolasib a sawrkar office hotute bakah PWD Office leh secretariat hotute leh Bilkhawthlir khawltang leh tlawmngai pawl hruaitute an tel a ni. Inkhawm hi PWD Joint Secretary chuan kaihruaiin, Engineer-in-Chief Pu C. Lalchhuana chuan project hmalak dan report pe in, Chief Engineer Pu B. Lalawmpuia chuan lawmthu sawiin hun a khar a ni.