Vawiin khan Chief Minister Pu Lal Thanhawla chuan ruihhlo ngaite enkawlna hmun Blessing Home, Sakawrtuichhun kum 25 tlin lawmna programme buatsaih chu a hmanpui a, Blessing Home kum 25 tlin lawmna puala lungphun a hawng nghal a ni.

Chief Minister Pu Lal Thanhawla chuan Blessing Home in kum 25 chhung ruihhlo ngai te, chhung tena an lo thinhrik leh khawtlang ten an duh loh, ruihhlo avanga boral mai tur chhanchhuahna kawnga chum lo chat lova an rawngbawlna leh Lal Isua hnena an hruai thleng chu ropui tiin Blessing Home enkawltu Pu V.L. Ruata Ralte, a nupui leh amah puibawmtute chu fakawm a tih thu a sawi a. Mi tlawmngai leh mi thahnemngai tena hetiang De-Addiction Centre an din hi a rampum angin kan chhawr hle a tiin Sawkar, khawtlang leh pawl angin theihtawp chhuahpui an ngaih thu a sawi. Ruihhlo ngai he hmun awm mek te chu beidawng lova, tawngtaina leh tumruhna nen Pathian thil tih theihna ring chungin mahni insiamthat leh kawnga theihtawp chhuah turin a fuih.

Ruihtheih thil chungchang sawiin Chief Minister chuan zu leh drugs kailawn hmasa ber chu kan ngaihmawh vak loh vaihlo, zuk leh hmuam te hi a niin a lang a. Zuk leh hmuam hi Setana’n Mizo Ringtute min bumna hmanrua anih tih kan hriata hemi kawngah hian mitin te fihlim tura tan lak nachang kan hriat a tul a ni, a ti. Zu leh hmuam tih nasat avangin Mizoram pawna awm Mizo ten inkhawmna hmun chungchangah harsatna an tawh thu sawiin zuk leh hmuam hi zu leh drugs an bawkin a ngawl kan vei thei a ni tih hi kan pawm a ngai a ni, a ti a. A sawi zel naah Pathian thu in ‘In thianghlim tur a ni, Kei Ka Thianghlim si a’ a tih te leh ‘In Taksa ah Pathian in chawimawi tur a ni’ tih te chu sawilangin kan taksa hi Pathian In, Thlarau Thianghlim In, a man a lei a ni a, kan taksa hmangin Pathian kan chawimawi tur a ni a, a duh loh zawngte tiin kan ti bawlhhlawh lo tur a ni tih hi kan pawm a ngai a, chutianga kan ngaihtuahna leh kan rilru te kan siam a pawimawh a ni, a ti. Mizo te hi Pathian hnam thlan leh Ringtu kan nihna zawn atang te in, Chanchin Tha hrila rahchhuah tura koh kan nih ang te in leh Ringlo mite tan entawntlaka kan awm theih nan kan in enchian leh inbihchian a tul hle niin ka hria, a ti bawk.

He programme hmanpuitu dang Social Welfare Minister Pu PC Lalthanliana chuan ruihhlo dona kawngah Sawrkar, Kohhran leh Pawl te hi tumah kan bang lova, ke kan pen tlana theihtawp kan chhuah tlan hi a tul a ni a ti. Ruihlho in a tih buai te, insiam tha tawh te chu Mizo society angah chuan endawngna awm lovin nun pangngai tak neiin khawtlang tan mi tangkai an ni thei a, nun hlui hi tuman kan inhriatsak lova, ser a awm lo a ni, a ti bawk. Ruihlo dona kawngah awareness campaign te chu thil tangkai leh tha nia a hriat thu te sawiiin Department in humsual daite leh nun kawnga mi vanduai te enkawlna atana hma lakna a neih mekte a sawi lang bawk a ni.

Blessing Home hi July ni 20, 1991 khan Pu V.L. Ruata Ralte in ruihhlo ngaite enkawlna leh chhanchhuahna atan a din niin mi tam takin he hmun atang hian ruihhlo laka an sal tanna chu bansanin insiamtha in nun kawng dik an zawh tawh a ni.