Vawiin khan MHIP Electric Veng Branch, Lawngtlai leh NYK te bul tuma naupangte'n Karate an zirna tur chu District Sports Centre, Electric Veng Lawngtlaiah District Bawrhsap Dr A. Muthamma IAS chuan a hawng.

Dr A. Muthamma chuan naupangte sikul chawlh hun awl hnawh khah nana Karate zirna buatsaih a ni chu lawmawm a tih thu a sawi a. Karate chu mahni invenna a nih mai bakah, mahni inrin tawkna leh mahni inthunun theihna min siamtu a nih thu sawiin, hmeichhe tan phei chuan zir makmawh, sawrkar laipui pawhin zir ngei ngei tura a tih a nih thu a sawi a. Zir turte chu ti mai mai lo va, uluk tak leh ngun taka zir turin a chah. He hun hi MHIP, Electric Veng Branch Assistant Secretary Pi J.Lalremruati'n kaihruaiin, Vice President Pi F.Liannguri'n inlawmna thu a sawi a. VC Member Pi V.Chhungliani'n hunserh hmangin, Branch President Pi Nichiangi'n lawm thu a sawi.

He hunah hian NYK District Youth Co-ordinator Pi Mercy Sellate, DIPRO Pu C.Lalhruaitluanga leh Karate zirtirtu tur te'n thu an sawi bakah, Karate show hmuhnawm tak thlir ho a ni bawk.

He Karate zirna hi thla khat chhung awh tur niin, naupangte sikul chawlh hun awl hma that nana buatsaih a ni a. Zir turin naupang za chuang an inziak lut tawh a ni.