Indian Medical Association (IMA) Meeting vawiin Aijal Club-a neih chu Health Minister Pu Lal Thanzara’n a hmanpui.
IMA Mizoram State Branch hi kum 1972 khan mi 20 pawh tling lo, Post Graduate degree nei phei chu pakhat chauh an la nih laia din nia a hriat thu leh tunah chuan pawl lian leh zahawm, member pawh 650 lai awmna, post graduate qualification nei ringawt pawh 300 chuang lai an lo ni thei hi a ropuiin a thlamuan thlak thu khuallian Pu Lal Thanzara chuan a sawi a. Doctor hmasa, a bik in Specialist hmasate Aizawlah kher awm tum lova thingtlang lam ah te awma sulsutu an lo nih thin na chuan tunah rah tha tak chhuah in Health Department tan hmasawnna leh hlawhtlinna tam tak lo sialtu an nih avangin lawmthu a sawi a ni.
IMA ah hian Sorkar a thawk kher lo Doctor a huam vek a, an hnathawh ber erawh damlo enkawl anih vek thu sawiin Health Minister chuan hmanrua te duh anga hman tur awm lo mahse taima leh rinawm takin Mizorama Doctor te hian damlo enkawlna ah hna an thawk tha hle,chutih mek laiin tan la leh zual turin a fuih. Mizoram kilkhawr ber ber ah Special Clinic neiin doctor tam tham tak te an feh chhuak thin leh kan thenawm ram Tahan (Myanmar) ah te nakum February thla tawp lamah clinic pui tham nei tura hma an lak na ah a fak a, sawrkar ang pawhin a theih ang anga puih an inhuam thu a sawi nghal bawk.
Khuallian Pu Lal Thanzara chuan Health Department in kawng hrang hranga hmasawnna an neih te sawiin Medical College neih theih nan tun ah Central Scheme atanga Rs 189 Crore atang in 40 Crore Central in a sanction tawh thu leh hna ruak hnawh khat nan atana hlawhtlinna neih mekah hmachhawp mek te pawh buaipui zel an nih thu a sawi a. Aizawl mai bakah Lunglei leh District hrang hranga hmasawnna te leh Lengpui Airport-a Medical facilities changtlung zawka thuam that tum anih thu a sawi bawk.
IMA 40th Annual Conference vawiin a hman Dr Vanlalruata kaihhruai ah hian an thawhpui kumina thi te sunna hun hman a ni a. Doctor-te’n thutiam thar leh in Annual Report Dr John Zohmingthanga, Hony. Secy IMA hnen atangin ngaihthlak a ni a. Hruaitu thar thlan nghal a ni.
