Chief Minister Pu Lal Thanhawla chuan vawiin khan Pi Chawnthangi W/o R.Z.Lalbuaia (L) building, Zodin-ah Canara Bank a hawng.

Chief Minister chuan Canara Bank in Mizoramah branch thar an rawn hawng chu lawmawm a tih thu sawiin, Nationalised Bank zinga a lian ber pathumna a hauh pha chu a lawmpui thu a sawi a. Mizoramah NLUP hmanga ram tichreutu, tlangram loneih bansan tum anih avanga loneimite chu an dinkhawchhuah nana tanpui dan awm thei angte dap turin Bank hotute chu a ngen a. Bank atanga loan kan puk thin te kan rul tha leh duhlo thin hi ringtu kan nihna nen a inhmehlo hle a ni a ti. Bank hawn thar tak hi mipui ten tangkai taka an hman a beisei thu a sawi bawk. Chief Minister te nupa hian joint account an hawng nghal a ni.

Canara Bank hi kum 1906 khan Mangalore, Karnataka ah din tan a ni a. Tunah hian ram chhung leh rampawnah branch 3250 neiin ATM Booth 2200 an nei bawk a. Sum an khawih chet hi Cheng vaibelchhe nuai 5 chuang niin, hlep ringawt pawh kum 2011 March thla thleng khan cheng vaibelchhe 4000 hmuin, Education loan ringawt pawh cheng vaibelchhe 3503 an pe bawk a ni. Pawisa transfer, mobile phone transfer thlengin engtiklai pawhin Nationalised Bank tawh phawtah chuan a tih theih reng dawn a ni.

Hawnna a hmarchhak bialtu, T.K.Haldar, Dy General Manager chuan Mizoram mipui tan theihtawp chhuah an tum thu sawiin, sorkar duhdan anga kal thei turin Chief Minister chuan kawng kawhhmuh thin turin a sawm nghal a ni. T.K.Haldar hian India hmarchhak state ah Nagaland leh Manipur tih lohah branch an neih vek tawh thu a sawi bawk a. Bank thar hian pawisa deposit cheng vaibelchhe 6 a bul tan tur an nih thu sawi bawkin, hnathawktu mi 5 an awm dawn a ni a ti.