Sports and Youth Services Minister Pu Zodintluanga chuan tukin dar 9:30 khan Kolasib ah Sports discipline 11 a naupang training pekna tur Catch Them  Young  a hawng.

Catch Them Young hawnna hi Kolasib Govt. Middle School ah neih a ni a. Hawnna thu sawiin Pu Zodintluanga chuan Kan tu leh fate anmahni khua leh hmun ngeia an Talent haichhuahna tur policy Catch Them Young Kolasib a hawn a ni thei ta chu a lawmawm hle a ni, a ti a.Tun hma lamah Talent kan neihte hai chhuak tura awmze neia tih a ni ngai lova. Mahni tih tihin kan tuina kan kalpui ringawt thin a, chuti chung chuan kan Mizo thalai engemaw zat chu India ram leh khawvel hriatah kan invawrh chhuak nasa hle  a ni, a ti a. Kolasib tlangval ngei Tv. Tuaitea pawh India ram ti hmingthatu a ni mek a ni, a ti. He Catch Them Young policy hi  sawrkar chuan Mizote talent haichhuaha a awm theih nan tiin Aizawl ah bul a tan a, a kalpui danah pawh hmanhmawh lovin hun engemaw chen a enchhin hnuah District  hrang hrangah a kalpui leh ta a ni a ti.

Sawrkarin Mizote Sports lama hma kan sawn theih nan Infrastructure lamah tan a la hle a, Rajiv Gandhi Indoor Stadium sak mek chu a ruangam zawhfel tawh a niin uluk taka chei bawl mek a ni, a ti a, Kolasiba Saidan hmunah Pawisa cheng vaibelchhe  4.9 sengin Regional Sports Centre pawh hna thawh mek zel a ni, Pu Zodintluanga chuan a ti a, Aizawlah  leh Lunglei ah te Central sawrkar Sports Authority of India bultum leh sensovin Coach te ruaiin discipline thenkhatah training pek chhoh leh mek a ni, a ti bawk a ni. Sawrkar hmasa a Kolasib Hmar veng Indoor stadium sum harsatna avanga  tihtawp tawh chu  Bialtu Minister Pu Zoram Sangliana tanlakna avanga chhunzawm leh zawhfel a nih tawh thu pawh a sawi a ni.

Minister chuan thingtlang mitena leirem rapa  sum leh paia ngialnghehna an neih theih nan leh an fate thluak tha tak tak  tunlai thiamna hmanga an enkawl ve theih nan anmahni dawmkanna turin NLUP chu sawrkarin a kalpui mek ta a ni, a ti bawk.

Pu R. Lalhluna, DSYO chuan hawnna inkhawm hi a kaihruai a. Pu R. Lalvena,IAS Secy, Sports chuan thu a sawi bawk a ni.

Catch Them Young hnuaiah hian a thawhkhatna atan Boxing ah naupang  31, Wrestling 20, Taekwando 131  an lut nghal a. Heta training tur hian mi 389 in dilna form an la chhuak tawh a ni. Catch Them Young hnuaiah hian sports chi hrang hrang Archery, Badminton, basket ball, boxing, cricket, football, kick boxing, table tennis, taekwando, volley ball leh wrestling ah te naupang talent haichhuah hna beih a ni dawn a ni.

Attachment

  • Loading attachment...