2211/2024-2025

Champhai, 25th September 2024: Vawiin khan Chief Minister Pu Lalduhoma chuan Champhai Grape Growers Society Winery, Tlangsam, a tlawh a. Society hotute nen inkawmna hun an nei.

Champhai Grape Growers Society hotute hian Chief Minister hnenah hian Grape Wine an tharchhuahte hlawk zawk leh zau zawka an hralh chhuah theih nan sawrkar hmalakpuina an lo ngen a. Grape Wine chu food item a nih anga zalen taka hralh theih an duh thu leh License-Vendor system pawh mumal zawka kalpui an duh thu an lo hrilh a ni.

Pu Lalduhoma chuan Grape Growers Society te chu an Grape leh Wine deh chhuah hralhna kawngah sawrkarin ṭhahnem a ngaihpui hle a ni tih hre turin a chah a. An thilsiamte awmze nei leh hlawk zawka an hralh theih nan hma an la dawn a, grape chauh ni lovin thlai dang atanga siamchhuah thilte pawh an ngaihtuah tel dawn tih a hrilh.

Mizoram sawrkar chuan flagship programme - ‘Bana kaih - Hand Holding Policy’ hmangin kuthnathawktute khai chhuah a tum mek a, he policy hnuaia hamṭhatna te pawhin an mamawh dan a zirin an dil thei tih a hrilh bawk.

Inkawmna hi Pu HS Vanlalfakzuala, Chairman, Champhai Grape Growers Society chuan a kaihruai a ni.

Chief Minister Pu Lalduhoma hi Champhaiah zan a riak ang a, naktukah Serchhip a pan ang.