2212/2024-2025

Dated Aizawl, the 25th September 2024: Vawiin hi khawvel puma Pharmacist-te ni a ni a. He ni pual hian Aizawlah pawh Mizoram State Pharmacy Council hmalaknain Bawngkawn South YMA Hall, Aizawlah kumin World Pharmacists Day thupui, 'Pharmacist: Meeting Global Health Needs' behchhanin hun hman a ni a. Pi Lalrinpuii, Hon'ble Minister, Health and Family Welfare, Govt. of Mizoram chuan khuallian niin a hmanpui.

Khuallian Minister Pi Lalrinpuii chuan kalkhawmte hmaah hian Pharmacist-te pawimawhna leh mawhphurnate sawiin, Pharmacy chu eizawnna leh mahni kea dinga sumdawnna tha tak a nih thu bakah Pharmacist-te chu damdawi siamchhuah kawngahte, damlote tana damdawi nghawng hrang hrangte pawh thiamna bik nei leh zirchianga hrechiang bertu an nih avangin, khawtlang tana tangkai zawka hma la zel turin a fuih a. District Hospital tinah tal damdawi lama thiamna bik nei Pharmacist-te an awm a pawimawh thu a sawi a. Hei bakah hian Mizorama ruihhlo leh HIV hluar zel chungchangah pawh Pharmacist-te chu thiamna bik nei an nih avangin tangkai lehzuala khawtlang, sawrkar leh midangte tana an thiamna bik hmang zel turin a chah bawk a ni.

Hun hman hi Dr. H. Lalhlenmawia, Vice President, Mizoram State Pharmacy Council chuan a kaihruai a. MSPC President Pu Lalsawma pawhin fuihna thu sawiin, Pharmacist-te leh zirlaite chu midangte tana tangkai zawk leh dan ang taka damdawi mipuiin an hmuh theihna tura hmalakna kawngah theihtawp chhuah turin a chah nghal a. Dr. Lalnunpuii pawhin kalkhawmte hmaah kumin khawvel pum Pharmacist-te ni thupui, 'Pharmacists: Meeting Global Health Needs' (Khawvel mipuite hriselna atana Pharmacist-te pawimawhna) chungchang presentation bengvarthlak tak a nei nghal a. Hemi zawh hian Pu F. Lalliantluanga, Executive Committee Member, MPSC chuan lawmthu sawiin hun hi a khar a ni.

World Pharmacists Day hi kum 1992 atang khan International Federation of Pharmacists huaihawtin kum tinin hman a lo ni tawh thin a. Vawiin hun hmannaah hian Dept. of Pharmacy, RIPANS, Laithangpuii College of Pharmacy, Mizoram Institute of Pharmaceutical Science leh Mizoram Pharmacy Council hotute, member-te bakah sawm bik mi pawimawh thahnem tak an tel a ni.