2213/2024-2025

Dated Serchhip, the 25^th September, 2024: Vawiin khan Serchhip DC Pu Paul L Khuma chuan Kawlri Tlanga Heritage Site a tlawh.

DC hian hnathawh kal mek te a hmunah a a endik a. PWD hotute, Heritage Society aiawh te leh Contractor te nen a hmunah joint verification an nei a ni.

He project hi NEC fund atanga thawh niin ‘Establishing Mizo Cultural Heritage Centre for Protecting the historical and natural heritage of Mizo at Kawlri’ tih hming pu a project hi thawh a ni a. Kawlri tlang hi Mizo Lal Bengkhuaia kut ata saphoin Mary Winchester ‘Zoluti’ an laklet  lehna hmun niin hriatrengna lungphun phun a lo ni tawh a. He hmun hi Mizo history a thil chhinchhiahtlak tak a nih avangin NEC hnuaiah project siamin Heritage Centre sak hna hi thawh a ni a. He Centre sak hna hi kumin May ni 1   atang khan bul tan a ni a. A hmunhma laih hna an thawk mek a, heritage centre sakna tur bungraw mamawh te lakkhawm mek a ni bawk.

He heritage site hi state pawn atang te leh Mizoram chhung hmun dang atanga khualzin te hip nan thil tangkai tak tur a ni a. Serchhip khawpui leh a chhehvel a cheng te tan pawh len khawthawna hmun remchang a ni a. A hmunhma hi a theih chin chinah environment humhalh zawnga hma lak a nih avangin a ngaw a la chhah tha a. Mizo history vawnhimna a nih bakah Serchhip District tan tourism hmasawnna kawnga thil tangkai a nih theih beisei a ni.

DC hi SDC Dr Marilyn Lalruatkimi leh I&PR official ten an tawiawm a ni.