671/2022-2023
Aizawl the 27th May, 2022: Vawiin khan Chief Minister Pu Zoramthanga chuan Nghilhloh Bu, kum 2022 Chapchar Kut souvenir chu CM Conference Hall-ah a tlangzarh.

Chief Minister chuan Nghilhloh Bu buatsaihtute chungah lawmthu sawiin, ziakmi hrang hrang te kutchhuak tha tak tak mi tam zawkin an chhiar tura chhawpchhuah a ni chu lawmawm a ti a. Chief Minister chuan Chapchar Kut chu a hnam ang zawnga Zofate suihkhawmtu pawimawh leh langsar ber nia a hmuh thu sawiin, kut kan lawm hian kan ‘culture’ a tha lai chawisan leh tihlarna ni zel se a tih thu a sawi a. Hun kal zelah mihring kan nunphungin hmalam pan zel angin ‘culture’ pawh thang a, hmasawn ve zel thei a nih avangin, a tha lai humhalh leh chawilar a, a tha lo lai kalsan thiam pawimawh a tih thu a sawi.

Nghilhloh Bu tlangzarhna programme tawi buatsaih hi I&PR Director Pu C. Lalnunkima chuan a kaihruai a. Prof. Malsawmliana, Joint Editor, Chapchar Kut Souvenir chuan a buatsaih a nih dan leh a chhunga thu awm tlangpui te a sawi a ni.

Chapchar Kut 2022 Nghilhloh bu ah hian phek 127 awmin, thuchah leh Mizoram hmun hrang hranga kumin Chapchar Kut lawmna report leh hlimthla dah a nih bakah thuziak mi hrang hrang te article 13 a awm a ni.