670/2022-2023
Khawzawl 27th. May, 2022 : Vawiin chawhma dar 11:00 khan 22-Tuichang Assembly Constituency huamchhung khua leh veng 24 a Village Level SEDP Committee Chairman leh Member Secretary te tan SEDP tanpuina dawngtu tur thlanna neih tura tul pawimawh inhrilhhriatna hun Khawzawl Zuchhip Branch YMA Hall-ah buatsaih a ni a, he hun hi Khawzawl Addl. DC Pu Lalvenhima'n kaihruaiin District Bawrhsap Pu C.C. Lalchhuangkima, Chairman, District Level SEDP Committee ni bawk chuan khuallian niin a hmanpui a ni.

He hunah hian khuallian chuan thu sawiin SEDP chu eizawnna insiamsakna leh eizawnna nei sate tanpuina tur a ni tiin chhungkaw tinzawn Family Oriented a nih rualin a remchan chuan Society anga kalpui theih a ni dawn tih a sawi a. 22-Tuichang A/C huamchhung khuate chu khaw taima tak tak an ni a, chuvangin SEDP kalpui turah pawh District mai ni lo, Mizoram ti hmingthatu an ni thei dawn a ni, a ti a. Village Level SEDP Committee te chu SEDP dawng tur an thlan chhuah ten tanpuina sum an dawnte a nihna tur ang taka an hman a, hlawhtlinna an hmuh theihna tura vil zui turin a chah bawk.

Vawiin Training-ah hian Village Level SEDP Committee Chairman leh Member Secretary te chu SDC Pu Obed Lalmalsawma'n training pe in zawhna leh chhanna hunte an hmang zui nghal a. Pu James Lalnithanga, SDO Sadar-in lawmthu sawiin training a khar a ni.