669/2022-2023
Lunglei 27th May 2022: Lunglei Town Sanitation Task Force chu vawiin khan an Chairman Lunglei DC Pu Kulothungan A kaihhruaiin Mizoram Cleanliness Competition 2021 thlirletna leh 2022 intihsiakna awm tur inpuahchahna kal mek sawi hovin Lunglei DC Conference Hall-ah an thukhawm.

Meeting-ah hian member secretary DUDO Lunglei Pi Vanthangpuii, a kaihhnawihsawrkar official-te, YMA, MUP, MHIP hruaitute leh Lunglei town area VC-te, Mizoram Autorickshaw Owner Association aiawhte an tel a ni.

Sanitation Task Force Chairman Pu Kulothungan A chuan Mizoram Khawpui Fai Inelna kum 2017 a neih tan atangin Lunglei District chuan kum tin lawmman kanla dawng ziah hi a ropui takzet a ni tiin tun dinhmun thleng thei tura rim taka thawka hun leh tha nasa tak seng tute Nodal Department UD&PA, khawtlang hruaitute, tlawmngai pawl hrang hrangte chungah lawmthu a sawi a. Faina kawngah Lunglei District mipuite kan harh thar zel chu lawmawm tiin zirtur leh hmasawn zelna tur tam tak pawh kanla nei ani tiin Lunglei District mipuite faina kawnga hmalak puiah a sawm a. Heng lawmman hlu tak kan dawn hi faina kawnga nasa zawka ke kan pen theihna tura rahbi pawimawh tak an ni tiin kalkhawmte chu tan la zual sauh turin a fuih a ni.

Member secretary DUDO Lunglei Pi Vanthangpuii chuan report pe in Lunglei chu pawn lera inthiar awm lohna Open Defecation Free Town niin hemi chung leh Open Defecation Free Plus Town ni turin Department chuan theihtawp a chhuah mek thu a sawi a. Solid Waste Waste Management Centre pawh hman theih tura peih fel tep anih thu a sawi bawk.

Meeting-ah hian Mizoram Cleanliness Competition 2022 neih tura inpuahchah dan tur te, bawlhhlawh thliar leh sawngbawl uluk zawka kalpui dan tur te, faina chungchang zau zawka mipui zirtir dan tur te leh Singel Use Plastic khapna ngawrh taka kalpui anih theihnana hmalak dan tur te sawiho a ni.

Kum 2017 khan Lunglei District chuan District Headquarter zingah lawmman pahnihna dawngin; kum 2018 khan District Headquarter-ah pkhatna leh Overall Ranking ah pathumna a ni a; kum 2019 khan District Headquarter zingah lawmman pahnihna dawngin North East Zone pumah ‘Best City in Innovation & Best Practices’ lawmman a la leh a; kum 2020 khan District Headquarter leh Overall Ranking ah Pakhatna dinhmun changin North East Zone pumah ‘Best City in Citizen’s feedback’ lawmman a dawng leh a. Intihsiakna hnuhnung ber Kum 2021 ah District Headquarter zingah lawmman pahnihna a dawng leh bawk a ni.