459/2023-2024

Aizawl, 16.05.2023: Chief Minister Pu Zoramthanga chuan vawiin khan kumin 2023 Chapchar Kut Souvenir Nghilhloh Bu chu CM office Conference Hall-ah a tlangzarh. Chapchar Kut thlirletna 'review meeting' in a chhunzawm nghal a ni.

Chief Minister chuan Nghilhloh Bu buatsaihtu editorial board member-te leh tha thawhtute zawng zawng chungah lawmthu a sawi a. Mizo hnam in kut kan neihte zingah Chapchar Kut chu a langsar ber leh hnam ziarang kan phochhuahna tha tak, state pawn leh ram pawn thleng ami pawhin an ngaihsak thu a sawi a. Kan unau Myanmar, Bangladesh leh ramdang a awmte pawhin min hlutpui in, hmang tura an rawn kal thin chu lawmawm a tih thu a sawi a. Chief Minister chuan hun kal zelah culture pawh zawi zawiin a inthlakdanglam hret hret zel a, chutiang chuan kut kan lawm dan pawh a tha zawngin, hma sawn zawngin a danglam zel thu a sawi a. Kut nuam leh hlimawm tak hman chhoh zel a la nih a beisei thu a sawi.

Kut Souvenir tlangzarhna inkhawm hi I&PR Director Pu C. Lalnunkima chuan kaihruaiin I&PR Jt. Director Pi PB Lianthangpuii chuan lehkhabu buatsaih a nih dan report a pe a. Art & Culture Director Pi Carol VLMS Dawngkimi, Chapchar Kut Programme Committee Chairman ni bawk chuan lawmthu sawiin hun a titawp a ni.

Chapchar Kut Post Souvenir ah hian thuziak 13 (Mizo leh English) bakah report leh kut hmanna thlalak hrang hrang dah a ni. Souvenir tlangzarh a nih hnu hian kut lawm dan thlirletna neih chhunzawm a ni.