455/2023-2024

Aizawl The 16th May 2023: Government Chhinga veng Middle School chuan vawiin khan an kum-60 tlin lawmna (Diamond Jubilee celebration) chu an school hall-ah an nei a. Sports and Youth Affairs Minister Pu Robert Romawia Royte chuan khuallian niin a hmanpui.

Diamond Jubilee lawmna inkhawm-ah hian Minister Pu Robert Romawia Royte chuan Govt. Chhinga veng Middle School in kum-60 lai an tling ta chu a lawmpui thu a sawi a. Government school-te chu tha tawkin an rintlak hle tih lanna chu an school in zirlai naupang fel leh thiam tak2 an nei chu a ni tiin a ropui hle a ti.

Minister chuan Chhinga veng Middle School zirtirtu thawk mek-te leh lo thawk tawhte chu fakin naupang an enkawlna kawngah an chhuanawm takzet a ti a. Zirtirtu, khawtlang hruaitute leh nu leh pate inpekna chu chawimawi tlak a ni tiin school hmasawn zelna turah theihtawp chhuah chhunzawm zel turin a chah bawk.

Khuallian chuan zirna a pawimawi hle tiin mimal, chhungkua leh khawtlang siamthatu a ni a ti a. Chhungkaw dinhmun chawikangtu leh thiltihtheihna, hmasawnna thlentu a ni tiin, taimakna leh chhelna nena zir duh tak tak tan chuan retheihna in zirna a ngam lo a ti bawk. Pu Robert Romawia Royte chuan computer thiam a pawimawh hle a ti a. Tunlai khawvel chu engkim computer-a innghat a nih tawh avangin a zirna lamah tan lak a, tharthawh leh a tul hle a ti. Zirlai naupangte chu fel leh thuawih taka zir chhunzawm zel turin a fuih a, dingchhuak ngei turin leh khawltlangin an chunga beiseina a nghahte tihlawhtling ngei turin a chah hlawm bawk a ni.

Diamond Jubilee lawmna pual inkhawm-ah hian Minister chuan Govt. Chhinga veng Middle School-te chu an kum-60 tlin lawmpui nan school naupangte tan school jersey leh pawisa fai a hlan bawk.

Vawiin Govt. Chhinga veng Middle School kum-60 tlin lawmna inkhawm hi Pu T. C. Thara, Govt. Middle School teacher chuan a kaihruai a. Rev. P. B. Mankima’n hunserh hmangin Pi. Zohmangaihi, Headmaster chuan report a pe bawk.

Govt. Chhinga veng Middle School hi January ni-16 1963 khan Dy. Inspector of School, Aijal-in phalna a pek ang thlapa din a ni. School hawn a nih kum hian class-IV leh V chauh hawn phalna pek an ni a, hemi kum hian naupang-26 an lut a, a kum leh atangin Class VI hawn belh a ni leh ta a ni.  School Building hi Building Committee in dinin theih ang anga sak nghal a ni a, kum-2001 vel atanga SSA Mission a lo awm tak atangin school compound-ah Block Resource Centre-te, Training Hall-te, Laldenga Computer Academy-te sak a ni. A hnu leh deuhah SSA Girls Hostel sak a ni leh a, chumai bakah school ram hawhin PHE Site Office pawh school ram chhungah sak a ni leh ta bawk a ni. Chhinga Veng Middle School-a kum 2023-2024 chhunga zirlai naupang zawng zawng chu-122 an ni.