458/2023-2024

Aizawl the 16th May, 2023 : Mizoram Samagra Shiksha hnathawhna atana Project Approval Board (PAB)-in a pawm chin tarlanna minute nimina tihchhuahah Mizoram Samagra Shiksha-in kum 2023-24 chhunga sum a hmuh tur chu vbch 560.72 a ni a, kum hmasa aia a punna hi zaa 49.2 a ni.

Mizoram zirna tarlanah mihring chenna khaw awm zat atanga zirna sikul hawn Gross Access Ratio (GAR) a pung a, GAR hi elementary-ah zaa 97.29, Upper Primary School-ah zaa 95.2, Secondary School-ah zaa 81.96 leh Higher Secondary School-ah zaa 47.87 a ni. Naupang zawng zawngin sikul an kal theih nan school hawn belh zel a ni dawn a, Primary leh Upper Primary School inkawp 2, Secondary school 3 te hawn belh a ni dawn a, Higher Secondary school-ah Science, Arts leh Commerce la awm lohna school 14 ah hawn belh a ni dawn a, hengte hi Science zir theihna 7, Arts zirna 6 leh Commerce zirna 1 hawn belh a ni dawn a ni. Heng bakah hian Science leh Arts stream inkawp school 1-ah hawn thar a ni ang a, Science leh Commerce inkawp hmun 2 ah hawn a ni bawk ang. HSS neih tawh sa school 1 ah Science zirna pek belh a ni ang a, School dang 1 ah Commerce zirna pek belh a ni bawk ang.

Vocational Education (VE) chu Secondary School 46 ah hawn belh a ni dawn a, School 7-ah job role 2 theuh pek an ni ang a, school 39 ah job role 1 theuh pek belh an ni ang. VE pek tawhna school hi a pumpui atanga chhutin zaa 25.5 atangin zaa 39 ah a kai chho dawn a ni. CSS Hindi teacher te hlawh tur hmuh a ni a. ICT facility chu elementary school 157 leh secondary school 60 ah pek an ni dawn a, Primary teacher 2652 te hnenah zirtirna atana hman tangkai tur tablet pek an ni dawn bawk. School tha lo sak thatna tur leh repair-na tur hmuh a ni a, Girls hostel 3 leh KGBV building sak thatna tur hmuh a ni a, Residential quarters 10 sakna tur hmuh a ni bawk. Hun rei tak chawlhsan tawh Pipe band Academy chu District 10-ah pek thar an ni dawn bawk.

Hnahthial leh Khawzawl District-ah DIET hawn thar a ni dawn a, Aizawl DIET building sak thatna tur leh SCERT building sakna tur te hmuh a ni bawk.

Zirlaiten Science zirnaah hriatthiamna thuk zawk an neih theih nan Higher Secondary School Science stream tan bilingual textbook (English leh Mizo-a ziah) siam a ni dawn a, MBSE zirlaibu Class I - XII te chu Braille textbook large print a siam a ni dawn bawk.

Ziak leh chhiar bulthut zirtirna NIPUN Bharat atan Class I - V zirtirna tur hmuh a ni a, RTE Act amend zulzuiin Class 3, 5, 8 te thiamna tehchhuahna tur neih theih beisei a ni a, Elementary leh secondary tan State Level-a Assessment neihna tur sum hmuh a ni.

Grassroots Sports Development Centre 40 neih mek chu belhchhahin Centre 6 dang siamna tur hmuh a ni. Tunah hian zirlaite tan Football, Hockey, Badminton, Weightlifting leh Boxing zirna hawn a ni tawh a, Centre dang 6 hawn thar turah hian Table Tennis, Taekwondo leh Basketball zirna hawn leh a ni dawn a ni.

Pre Primary School 49 hawn belh a ni dawn a, BRC thuamthatna tur hmuh a ni a. Aspirational District Mamit-a School 10 tan Tinkering Lab hmuh a ni bawk.

Kum 2022-23 chhunga 2nd installment dawn loh avanga la thawh hman lohte thawhna tur sum hmuh a ni bawk.

Mizoram Samagra Shiksha chuan Mizoram zirna tihhmasawnna tur Annual Work Plan & Budget sum thahnem tak PAB-in a pawm chu lawmawm a ti hle a, hemi atana School Education Minister thawhrimna leh inpekna lawmawm a ti hle a ni.