Vawiin khan  kum 1967-a  rambuai avanga  Salam, Sialhau, Vanchengte, Lamchhip leh Vaihal khua te Chhiahtlang khuaah sawikhawm an nih kum 50 tlinna leh hriatrengna hun Chief Minister Pu Lal Thanhawla ho in an hmang a. He hun hi Chhiahtlang Govt. Middle School Field -ah hman niin Chhiahtlang khawchhuak, hmun hrang hranga khawsa tawh ten an rawn chhim a ni.

 Chief Minister Pu Lal Thanhawla chuan thudik thangtharte hriattir chu kawngdik kawhhmuhna leh muanna hlutzia kawhhmuhna hun remchang a ni a ti. " Kum 1967 January ni 3 atanga intan in Mizoram chhunga khaw za zela khaw sawmriat zet chu khaw 102-ah hreawm takin sawihkhawm a ni a. Protected & Progressive Village tih hming put tir a ni nachungin Sawikhawm khaw chhunga tawrhna nasa tak leh a hming mawi tak chu a inmil thei lova, a chhan chu a chhungah kohhran, khawtlang nun a zalen lova, huan leh lo a siam theih loh avang te, eng hna mah a thawh theih loh avangin ei leh bar  a harsa a, nunau an him lo a, mipa tawh phawt chu rinhlelh an ni vek a. Kum 1972-ah Gauhati High Court in Dan palzutna nasa tak a awm tih hria in a ti tawp", tih a sawi a. Rambuai vanga kum 20 chhungzet  tah leh hathialna kha thil hriatthar leh fo chakawm leh hriatchhuah  nuamlo tak ni mahse thang leh thar ten chiang taka an hriat a, an pi leh pute tawrhna atanga remna leh muanna a hlutzia te an hriat nan hmang se a duh a tih a sawi a. Kum 20 chhung Rambuai vangin hmasawnna a awm thei lo a; midang te aiin Mizoram pawh nasa takin hnufum phah a ni a ti.

Chief Minister chuan Polictics chu mihringte hnenah inrelbawlna leh hma an sawnna atana Pathian in a pek a ni a. Hman sual a thiang lova, mahni leh chhungkhat lainate sahmim ip tihpuarna atan hman chi a ni lo tih sawiin ram rawngbawlna a ni a ti. Duhamna leh sum ngainatna a tel chuan politics a fim thei tawh lova hmasawnna kawnga hnathawh pawh a sawt tawh thin lo a ti a. Hmasawnna ruhrel din tura hmalakna tam tak chu sum ngainatna leh kuttling lova sum neih tumna in a ti kal hlei thei lova a pawi hle a ni a ti a. "NH54, Aizawl to Tuipang kawngpui, 4-lane a tih zauh tumnaah pawh Japan nen thawhho a ni dawn a, mipui ten kan that tlanna tur a ni tih hria in harsatna siam lo turin kan in ngen a ni", a ti. Chief Minister Pu Lal Thanhawla chuan kumin March ni 1 atanga nimin piah deuh thleng pawha ruah a tlak reng avanga hnathawh a harsat thu a sawi a. "Thil tha duhte chuan ruahsur lai a blacktopping thawhtir hi kan remtih a rinawm lo a; khawthat veleh kawngsiam hna chu thawk tura inpeih reng a ni", a ti a. "Tih el hnatlang thawh te pawh hriattur a awm thin a,  a mawi ber em tih te, a Mizo tih chi em tih te kan inzawh a ngai a. Chutih laiin khua leh tui tha, ram hmangaihtu tam takin hei hi ram tan ka tih ve tur a ni e, ka mawhphurhna a ni e tih rilru pu a  hnatlang vawi enge maw zat an thawk thin tih hriat hi a nuam a, an hnenah lawmthu ka sawi tak meuh a ni", a ti.

Chhiahtlang khawkhawm hriatrengna hun hi Pu Lalremliana, Organising Chairman in a kaihruai a. He hunah hian Rambuai leh tun inkara fam chang ta te pualin sunna hun te hman a ni a, sunna hla pawh ngaihthlak niin Khawkhawm hun laia tawrhna te chu hlachham leh lemchan inchawhpawlh a entir a ni. He hun puala Souvenir buatsaih chu Dr.H.Lalthlangliana, Organising Committee Adviser in a tlangzarh a.Organising Adviser  Pu R. Chhungthana'n he hun puala a inpuahchahna a ziah chu chhiar chhuahna hun hmangin Chhiahtlang VCP Pu CR Dothanga'n Chhiahtlang danglam bikna te tlem a zawng a tarlang a ni. Chhiahtlang VCP thusawiah hian Chhiahtlang khua chu gravity behchhanna vantlang tui in tur la haw hmasa ber pawl an ni tih a lang a. Khawfai ber nihna te pawh lo hauh tawh thin in kum 50 chhung zet Chhiahtlang khuaah hian Tualthahna a thleng tawhlo a ni.