June ni 4, 2018 zan dar 7 vela Lunglei, Lunglawna Pu Vanlalpeka in leiminin a hnawl avanga chhiatna rapthlak tak thleng leh hemi zan vek, zanlaia Pangzawl daia lirthei chesuala mi engemawzat thi leh hliam an awm chu pawi a tih tak zet thu Mizoram Chief Minister Pu Lal Thanhawla chuan a sawi. “He thil thleng hian min tilungngaiin min nghawng na hle a, chhiat tawk chhungkuate ka tawrhpui takzet a. He vanduaina rapthlak tak an chunga lo thleng hi hriatthiam har hle mahse Pathian chakna ring chungin chhel taka tuar fan fan turin ka chah a ni,” Chief Minister chuan a ti. Disaster Management and Rehabilitation Minister Pu Ngunlianchunga bakah MLA dang pahnih Pu Joseph Lalhimpuia leh Pu Chalrosanga Ralte te chuan chhiatna thlenna hmun an tlawh tih sawiin Pu Lal Thanhawla chuan vanduaina tawk ta chhungkuate chu sawrkarin kalphung a neih ang zelin zangnadawmna leh tanpuina awm thei ang ang pek an ni ang, a ti.