Disaster Management & Rehabilitation Minister Pu C. Ngunlianchunga chuan nimin tlai lam ruahsur tam lutuk avanga dar 7:00 pm vela leiminin Pu Vanlalpeka in Lunglawn, Lunglei ami a hnawla nunna chante leh hliam tuarte a tlawh a. Mitthi vuinaah a telpui a ni. Pu Dolianbuaia, Jt. Director, DM&R chuan a tawiawm a. Mitthi vuinaah hian Lunglei East bialtu MLA Pu Joseph Lahimpuia, Lunglei District Bawrhsap Dr Ankita Chakravarty, IAS, District official-te leh mipui thahnem tak an kalkhawm.

Pu C. Ngunlianchunga chuan Lunglawn Lungleia leimin rapthlak tak thlengah mi sawm (10) zetin nunna chanin mi pali (4) ten hliam an tuar tih ka hriat khan min ti lungngai a, chhiat tawk chhungkua te thinlung takin ka tawrhpui a ni, a ti. He leimin leh nizan zanlaia Pangzawl daia lirthei chetsualna thlengte chu Zoram tan chanchin lungchhiat thlak tak nia a hriat thu a sawi bawk.  DM&R changtu Minister chuan Mizoram sawrkar chuan heng chhiatna avanga nun chan leh hliam tuarte a tawrhpui tak zet thu sawiin zangnadawmna pek chhuah kawngah pawh hmalak thuai a nih tur thu a sawi. Minister hian khawhar chhungte hnenah ralna thilpek a hlan nghal bawk a. Leiminin a hnawl Pu Vanlalpeka in chu a hmunah a tlawh nghal bawk a ni.