Chief Minister Pu Lal Thanhawla chuan vawiin khan Dapchhuah ah Public Works Department-in Tut Lei (Pre-Stressed Concrete Girder Bridge) an dawh chu a hawng. He programme ah hian Pi Lal Riliani, President of Indian Society on Tobacco & Health (Mizoram Chapter), Mamit bialtu MLA, Transport Minister Pu John Rotluangliana, PWD Minister Pu Lal Thanzara, Minister of State Pi Vanlalawmpuii Chawngthu, Political Adviser to CM Pu Lalrinmawia Ralte leh ZIDCO Chairman Pu VL Robiaka te an tel a ni.

Chief Minister Pu Lal Thanhawla chuan Vantlang hi mipuiin an thil neih intawm a ni tih hre reng chunga mawhphurhna nei tlang vek kan ni tih hriat a pawimawh a ni, a ti a. Chumi ah chuan Dapchhuah khaw mipuite chu a thuthmun a awm annih avangin neitu rilru pu chunga enkawl thin turin a chah bawk. CM Pu Lal Thanhawla chuan inkalpawhna siam chungchangah ramin chak zawka hma a sawn theih nan a thawktu department in hma an la thin a. Chutihrual chuan department ta nilovin mipui ta a nih avangin mipuiin neitu rilru an put tul a tih a sawi a. Khuarel chhiatna chu dan zawh rual loh ni mahse, mi thenkhat ngaihtuah thui tawk loh avanga lei dawh kilhna hmanrua thenkhat lo ru bo te, leiin a dawl chin bak a rit phur a lirtheiin an zawh avanga chhiatna thleng thei a nih avangin kan fimkhur tlan a tul a ni, a ti. Chief Minister chuan sawrkarin kawng hrang hrangah hmasawnna hna thawkin, rel kawng, Kaladan Multi Modal Project te leh project dangte bakah power lamah te, Health care lamah te, Agriculture lamah leh skill development lamah te hmalak a nih thu tarlangin, Mizoram economy pawhin hma a sawn phah thu a sawi a. Chutih rual chuan sum ngainatna avanga hmalakna hrang hrang tihthuanawp  zawnga compensation beisei tam tak an awm thin chu pawi a  tih thu a sawi a. Ram leh hnamin hma a sawn a, humhalh a nih dawn chuan  rinawmna mipuiin kan neih a pawimawh thu a sawi.

PWD Minister Pu Lal Thanzara chuan chuan RCC lei, lirthei eng chi pawh dawl tura design, Indian Roads Congress in standard sang ber tura ruahman anga dawh Tut Lei hawn a ni ta chu lawmawm a tih thu a sawi a. Mamit District pumpui tan malsawmna ropui tak a ni, a ti. PWD Minister chuan kar hmasa May 30 zan dar 10 vel khan Lengpui Airport kawng a Tlawng lui kaina, Bailey bridge tihchak belhna pawh zawh a ni tawh thu tarlangin, he lei hi tun hma chuan fit 200 a sei leh, motor tonnep 20 a rit chin kal theih ni thin kha tunah chuan a sei zawng pawh fit 170 niin, motor tonne 35 a rit chin kal theih a ni tak thu a sawi. Rei tak chawlhsan tawh bailey bridge pawh RCC lei dawh tura hmalak dan chungchang sawiin, lui kama a dona ban innghahna, hnuailam kawrawng awm avanga hna thawhlai chawlhsan tak chu uluk taka phailam mithiamten an endik hnuah, hna kallai tawp sana a thar dawh tur a ruahman a nih hnuah DPR siamtu zawnna tender vawi 6 lai chhuah nawn a nih thu leh, chumi hnuah harsa taka thawktu hmuh niin, chumi hun chhung chu a rei thu a sawi a. Tunah design leh estimate engkim peih a ni tawh mahse sanction hmasa sut (de-sanction) phawt loh chuan DPR thar sanction theih a nih loh avangin chutiang tura rawtna Ministry of Road Transport & Highways hnena thehluh tawh chu umzui mek zel a nih thu PWD Minister hian a sawi a ni.

Minister Pu Lal Thanzara chuan Mizorama lei dinhmun tlangpui a tarlang a. State road bikah Lei chi hrang hrang 75 leh, National Highways-ah Lei 52, a vaiin PWD enkawl lei 127 a awm a. Heng zingah hian lei kumhlun chi (permanent bridge) 73 leh, lei kumhlun lo (temporary bridge) 54 a awm. Temporary bridge zingah hian thir zawm a dawhkai (bailey bridge) 47, lei inkhai (suspension bridge) 4 leh, thing lei (timber bridge) 3 an awm a. PWD Vision ruahman dan chuan heng temporary bridge zawng zawng hi kum 2030-ah chuan permanent bridge-a thlak vek hman tum a ni.

Tut Lei hi metre 11.25 a zau niin, ban kar 3 awmin, luiah a dotu ban (pier) 2 leh a sir tawn tawna lei innghahna (abutment) awm ve ve in, a vaia a sei zawng chu metre 128 a ni. Lei in a dawh zawh chin (load capacity) chu 70R niin, hei hi Indian Standard a load sang ber a ni. Lei hi tui tlem lai bera a chim chin chu metre 310.15 niin, tui chim san ber lai chu metre 329 a ni.

State PWD chuan Tut Lei hi a thar a dawh tur buatsaih turin Consulting Engineering Services (India) Ltd, New Delhi ruaiin, kum 2003 khan Feasibility Study leh Detailed Project Report (DPR) a buatsaih a; March 31, 2006 khan MoRT&H chuan sanction a rawn pe a. Amaherawhchu, sanction a lo chhuah khan rate hman kha a hniam lutuk avangin October 30, 2007 khan sanction tawh chu sut leh a ni a. Chumi hnu November 2007 khan DPR thar theh lut leh in, March 2009 khan MoRT&H chuan cheng Vaibelchhe 13.132 chu a rawn sanction tha leh ta a. Sanction hmuh hnuah tender chhuah leh vatin, July 2009 khan a chhang hniam bertu Tantia Construction Ltd, Kolkata hnenah cheng Vaibelchhe 10.797 in pek a ni ta a. Tut Lei hi National Highway No.44A project ni mahse a siamna tur hi sum a hranpa a senction niin contractor pawh hna dang nen inpawlh lovin a hranga thlan a ni.

Contract Agreement anga hna thawh tan hun tura ruahman chu August 2009 niin, thla 24 chhunga zo tura ruahman chhin a ni a. Mahse Compensation leh Forest Clearance tihfel ngai a awm avangin a hunah hna tan mai theih a ni ta lova; June 6, 2011 khan tan theih ni ta chauh in, hna tan a nih hnu hian harsatna eng emaw tawh leh zel niin estimate pawh siamthat leh a ni a. Revised Estimate siam leh sanction nghah chhungin hna chu chhunzawm zel ni tho a. February 10, 2016 khan Ch.Vbch 19.26 chu MoRT&H chuan a rawn sanction tha leh ta a. Revised sanction hmuh atanga thla 10-na, December 31, 2016 khan Lei chu zawhfel a ni ta a; hna zawh thlenga senso zat chu cheng vbch 15.50 a ni.

Lei dawh hi December 2016 a zawh ni mahse MoRTH duh dan angin a design load a zo dawn nge dawn lo tih chu enfiah (load test) a ngai a. Thuneitu atanga remtihna neih hnuah tender tum hnih chhuah hnu ah June 2017 khan Mechfab Engineering Industries Pvt. Ltd. Guwahati chu thlan a ni ta a. An ni hian load test hi ti nghal in a test result pawh hi August 2017 khan an thehlut a. Mahse, an tihdan kalphung zirchian hnuah dik tawk lova hriat a nih avangin test nawn leh tura hriattir an ni a. Tui tlem leh hnu kumin kumtir lam khan tih that leh a ni a. Test result hi February 2018 khan an rawn theh lut leh in hawn theih in a lo awm ta chauh a ni.

Tut Lei hawnna puala inkhawm buatsaih hi Er. R. Vanlaltluanga, Engineer-in-Chief, PWD chuan kaihruaiin, Er. C. Lalchhuana, SE, Nation Highway Circle-I chuan report a pe a. Er. K. Lalsawmvela, Chief Engineer, PWS (Highways) chuan lawmthu sawiin hun a khar a ni.

Environment, Forest & Climate Change Department huaihawtin Rawpuichhip leh Dapchhuah inkar kawng sirah Chief Minister leh a nupui Pi Lal Riliani bakah Transport Minister leh Cooperation Minister ten thing a phun bawk a ni.