Nimin Inrinni-a Mizoram chhimlam khuate fang tura zinchhuak Chief Minister Pu Lal Thanhawla chuan nizan khan Sangau a thleng a. Tourist Lodge a amah lo hmuahna inkhawm tawite buatsaihah Chief Minister chuan tun ang zanah pawh Sangau mipui leh mipawimawh tak tak ten an lo la hmuak chu lawmthu  sawi a. Tualchhung inawpna Village Council leh Distirct Council te chu inrelbawlna pawimawh tak anih avangin sorkar chuan a ngai pawimawh hle a ni, a ti a. 13th Finance Commission pawhin sum tam zawk a ruahman sak thu a sawilang bawk a ni.

Chief Minister chuan V/C leh District Council te hi inkhualtelem-na a ni lo tih sawiin midangten sorkar-na an siamin harsatna an nei thin a, chutiang chu keini chuan kan duh ve lo a ni, a ti. Chuvangin an aiawh an thlante chu uluk tur leh hotu remhria thlang thin turin a chah a ni.

Chief Minister chuan District Council te hian thuneihna tam zawk an neih hi tha an tih thu sawiin Direct Funding pawh neise tha an ti a ni, a ti.

Chief Minister hian naktuk Thawhtanni hian Saiha tlawhin a tuk leh Thawhlehni ah Greater Saiha Water Supply Scheme tur lungphum a phum ang.

Chief Minister hi a nupui Pi Lal Riliani bakah Pu H. Zothangliana, Parliamentry  Secretary; Pu R. Lalrinawma, Chairman, Law Commission leh Pu TT Zothangsangsa, MLA ten an tawiawm a ni.