3395/2024-2025

Dated Chhingchhip, the 6th December, 2024: Vawiin khan Chhingchhip Sainik School te chuan Annual Day vawi 8 na, an school-ah an hmang a. Chief Minister chuan khuallian niin a telpui a. Bialtu MLA Pu PC Vanlalruata, Minister, Lt. Col. Clement Lalhmingthanga, MLA leh official pawimawh ten Chief Minister hi an tawiawm.

Thu a sawinaah Chief Minister chuan, Sainik School hi India rama school tha pawla ngaih a ni a, Sainik school chhuak mi hlawhtling leh ropui tak tak sawi tur tam tak an awm. Chhingchhip Sainik School pawh kan beisei sang hle a. He school tana kan insenna te hi investment ah kan ngai a ni. India rama Sainik School zinga Girls Cadet admission nei hmasa ber in ni pawh hi a lawmawm. Zirna pangai bakah sports lamah te, culture & tradition lamah te intitha thin hle tih pawh kan hria a, sport ah phei chuan national level award pawh in dawng nual tawh nghe nghe. Vawiinah naupangte theihna ropui tak tak ka rawn hmu a, rilru an tihlim hle.

Naupangten theihtawp lo chhuah zel ang che u. School tha taka in zir thei hi in vannei hle a, a tha thei ang berin in zirchhuak dawn nia. Mizoram leh India hian lehkhathiam, kan ram leh hnam tana mi tangkai kan mamawh a, Chhingchhip Sainik School atang hian chutiang mi chu rawn chhuak se, tiin kan suangtuah thin. Mizoram sawrkar hian kumtin he school hi grant tam tham tak pe thin a. Chutianga phur taka sawrkarin he school a grant thin chhan chu zirlai hlawhtling tak tak kan neih theih nan a ni.

He school thuneitute leh zirtirtu zawng zawng te chungah lawmthu ka sawi a. In kal zelna turah duhsakna ka hlan che u a ni, a ti.

School Office Conference Hall-ah school thuneitute nena inkawmna an nei nghal a. School tihchangtlun zelna tur hmachhawp te an sawiho.

Lt. Col. Kartik Sood, Principal chuan an school report a pe a. Chhingchhip Sainik School hi April 2017 a din a ni a, India rama Sainik School 26 na a ni. Tunah chuan Sainik School hi India ramah 33 an awm mek a, Ministry of Defence hnuaia Sainik School Society in a enkawl te an ni. Chhingchhipah hian Class 6 -12 zirna a awm a, India rama girls cadet nei hmasa ber an ni. Annual day ah hian naupangte hian zirna pangai baka thil dang an zir thiam hmuhnawm tak tak Drill Demonstration, Gymnastic, Martial Art, Khukri Dance leh thil dang te an entir a. Tunah hian zirlai 388 an awm mek a, an zinga 52 hi hmeichhia an ni. A zir man hi naupang pakhat tan kum khatah Rs. 2 lakh vel a ngai a. School ah hian shopping complex thlengin a awm.

Annual Day ah hian Er. Lalhriatpuia, IAS, DC, Aizawl, Pu Paul L. Khuma, DC Serchhip, Maj. Gen. Suresh Bhambhu, SM, IG AR (east), Brig. Girish Upadhya, SM, VSM, Colonel Imliakum Keitzar, SC, Commandant, 42 AR, Colonel Mukesh Sauhta, Commandant, 2 AR, zirlai naupang nu leh pa te an tel a ni.