Vawiin khan Chief Minister Pu Lal Thanhawla chuan Zo Reunification Organization (ZoRO) General Headquarters in Chin Lushai Conference January ni 29, 1892 a Fort William a neih champhaphak vawi 125 denchhena inpumkhatna leh insuihkhawmna atana ni 3 awh programme, Diakkawn YMA Conference Hall a an buatsaih chu a tan ni ah khuallian niin a hmanpui.

Chief Minister Pu Lal Thanhawla chuan Zo hnahthlak hnam hrang hrang te insuihkhawmna leh inpumkhatna atan Sawrkar ang pawha theihtawp chhuaha hma lak mek a nih thu sawiin tunah rih chuan Sawrkar pathum hnuaiah awm mah ila, thisen zawm kan nihna leh chhulkhatkual kan nihna hi a bo dawn chuang lova, Pathian in rem a tih hunah rorelna pakhat hnuaia kan awm ngei ka beiseiin ka ring a, mahse he hun hi beiseina nung nen kan nghah a ngai a ni, a ti. Zofate inpumkhatna  atan leh khawvel huapa pawl lian ber UNO thleng hiala Zofate chanchin leh rorelna pakhat hnuaia Zofate kan awm theih nana ZoRO in theihtawp chhuaha hma an lak tawhna leh hma an lak mek te chu lawmawm tiin an hnathawh chu ropui a tih thu a sawi a, Mizoten tunah UNO kan hriat dan leh 1966 a UNO kan hriat dan chu a danglam hle nia a hriat thu a sawi bawk.

Hnam rilru nationalism chungchang sawiin Chief Minister chuan nationalism hi hmui leh tawngkam ah mai ni lovin kan thinglung leh kan rilru ah te a awm a ngai a, takna leh dikna a mamawh a, hetiang ngaihtuahna nen inpumkhatna kan vei chuan tun aiin Zohnahthlak te inpumkhatna leh inunauna hi a chak leh zual ka beisei a ni, a ti a. Zo hnahthlak te ram luah chin hi Kumpinu Sawrkarin diklo taka thendarhin ram pathum hnuaiah kan awm a mahse tunah rih chuan kan Sawrkar awmna theuha khua leh tui tha, khua leh tui rinawm nia kan awm a ngai a, a bik takin ram danga awm Zo hnahthlak te chu hemi kawngah hian fimkhurpui an ngai hle nia a hriat thu a sawi bawk.

Mizoram pawna awm Zo hnahthlak ten Mizoram hi Zofate Jerusalem ah an ngaih leh an pawm thu sawiin kan tling emaw kan tling lo emaw nu leh pa chan chan hi kan mawhphurhna theuh a ni a, Mizorama cheng ten hetiang zawnga kan ngaihtuaha hma kan lak tlan a ngai a. Mizoram Sawrkar chauh hi Zo hnahthlak te Sawrkar awm chhun a tih theih a, chuvangin nu leh pa tling kan nih theih nan kawng engkimah Mizorama cheng te hi  entawntlaka kan awm leh kan nun a ngai a, a ti a. Mizoram chhunga Zo hnahthlak tawng kan hman chauh hi Zo hnahthlak tawng a ni lova, Mizoram pawna Zo hnahtlak te tawng hman hi Zo hnahthlak tawng vek a ni tih hi kan pawm a ngai tiin tawngkam thlahdah chin loh a that thu a sawi.

Ram chhung leh Ram pawna Zo hnahthlak te duhsakna a dawn thin chu ropui a tih thusawiin Mizoram pawna cheng Zo hnahthlak te tumruhna, taimakna leh Sawrkar ei lova an khawsak theihna chu ropui leh entawntlak nia a hmuh thu a sawi a.  Zo hnahthlak te hi kan nep lovin kan duai lova, Pathian laka kan special zia te hi kan hriat a tha a,  inpumkhatna leh insuihkhawmna atana YMA leh zirlai pawlte hmalakna leh hnathawh te hi a ropui a, thahnemngai taka ZoRO hmalaknate hi a ram leh a hnam hmangaihthlak a ni, a ti.

Inpumkhatna leh insuihkhawmna atana hmalakna leh ke penna te chu fimkhur a ngaih thusawiin  a ka duhna kalkawng hi a harsa a, kihhnawk awm lova hma lak kan thiam a tul a, hnung lama mit nei te kan veng a ngai a mahse rilru khata kan awm a kan inpumkhatna ti chak zawnga ke kan pen zel chuan kan tum ram hi kan thlen ka beisei tlat a ni, a ti a. Kan tumah kan chian chuan tuman min dal thei lova, a tam thei ang berin he thil hi kan rilru leh kan thinglunga kan vei a, hma kan lak chuan engtikah emaw chuan rorelna pakhat hnuaia kan awm ka ring tlat a ni, a ti.

ZoRO hruaitute hian Chief Minister Pu Lal Thanhawla’n Zofate inpumkhatna atana hna a thawh chu ropui tiin chawimawiin ngaihhruina an hlan a. He hunah hian Pi Lal Riliani chuan ZoRO in CYMA, MZP, MSU leh Zofa Global Network (ZGN) ten inpumkhatna atana hma an laknate chawimawina thuziak an buatsaih chu a hlan a ni.

Vawiin hi he programme ni khatna niin February ni 2 thleng a awh dawn a. Nitin in Session hrang hrang neiin hun buatsaih a ni dawn a. Vawiina programme hi Pu C. Chawngkunga, Consultant, ZoRO  chuan kaihruaiin Chin Lushai Conference chungchang leh Kumpinu in Zo hnahthlak te a thendarh dan chanchin te a sawi a. He hunah thusawitu dang CYMA President Pu Lalbiakzuala chuan YMA in inpumkhatna leh insuihkhawmna chu YMA ngaihpawimawh ber a ni tiin hemi kawngah hian YMA chuan ke pen in hma a la zel dawn tih a sawi. He hunah hian ZoRo Gen. Hqrs. hruaitu President Pu R. Sangkawia leh midangte pawhin thusawina hun an nei bawk a ni. Vawiin programme ah hian Parliamentary Secretary Pu Hmingdailova Khiangte leh bialtu MLA Pu P.C. Zoram Sangliana ten Chief Minister hi an tawiawm a ni.