636/2025-2026

Aizawl the 16th May 2025: Vawiin khan Digital Transformation Conclave vawi 17 na, Department of ICT, Mizoram, Govconnect, Google Cloud leh Ilouge Media te tangkawpin Dawrpui Multipurpose Hall-a an buatsaih chu Chief Minister Pu Lalduhoma chuan a hawng a. Dr. Vanlalthlana, Minister, ICT chu khualzahawm a ni.

A hawnna thu a sawinaah Chief Minister chuan, internet kaltlanga mipuite hnena service pek chhuah tangkaizia leh awlsamna te, mipui leh sawrkar tana awlsamna thlen ve ve thei a nihna te kan hriat avangin kan sawrkar phat atangin online service lamah tan kan la nghal a. Mipui Aw- Mizoram State Public Grievances Redressal & Monitoring System changtlung zawk kan hawng nghal a, a hnuah Kai Apps te, RAMP- MSME Facilitation Cell and Portals te, SDG Dashboard - Sustainable Development Goals lama khaw tin dinhmun hriat theihna tur te, MPLAN - Mizoram State Project Monitoring Dashboard te, e-RAM – mipuiten internet hmanga Revenue Department an dawrna tur te, online ILP system te, Aizawl Civil Hospital online OPD card te leh thil dang dang kan kalpui zui zel a. Hmalakna dang sawi tur pawh a awm nual. Tuna kan hmalakna langsar tak pakhat chu e-office kalpui tur kan inbuatsaih mek hi a ni. Artificial Intelligence, Cloud Computing, Cybersecurity leh Data Analytics thlengin, ram inrelbawlna leh mipuite tana hnathawhna kawngah a tul angin hma kan la zel ang.

Heng kan hmalaknaah hian kan thalai thiamna nei te tan zau takin kan inhawng a. A tul angin midang te pawh kan thawhpui bawk. Tun thlatir mai pawh khan ka bial, Serchhip ah AI chungchang zirhona buatsaih turin LushAItech mithiam te ka tir chho a ni, a ti a. Mizoram leh India ramin digital Service lama hmasawnna duhawm tak tak a hmuh zel theih nana thawhpuiah kal khawm te hi a sawm a ni.

Mahni inseng so va, he hun hmang tura lo kal mimal leh company te, sawrkar laipuia thuneitu sang lo kal zawng zawng te chungah lawmthu a sawi.

Nizan lamah Mizoram sawrkar website pakhat chu hackers ten min tihbuaisak a. Nimahsela, rang takin kan siam tha (recover) lehnghal a ni. Tun hnaiah kan website dang te pawh an rawn bei zauh zauh va mahse ICT lama kan thawktuten an lo dang chat thei zel rih, tiin mipuite tlawh tam website, a bikin dot gov enkawltute lo fimkhur zual turin a ngen.

Khualzahawm Dr. Vanlalthlana, Minister, ICT pawhin thusawiin, conclave buatsaihtute chungah lawmthu a sawi a. Tunlai khawvelah Artificial Intelligence hian mitin nun a khawih tawh a. Loneituin a mamawh a, nu leh paten an fate venhimna hmanruaah an mamawh a. Internet Service tinrengah thuk takin a inrawlh zel tawh. Tangkai taka mipuiten kan chhawr theih nan Internet service chak, mitin thleng phak kan mamawh a, cloud service lamah data him neih kan mamawh bawk. Viksit Bharat 2047 panna kawngah digital service hmalakna hi a pawimawh em em a ni, a ti. Conclave chuan Mizoram hmasawn zelna kawngah nasa taka a puih a beisei thu a tarlang bawk.

Pu Khilli Ram Meena, IAS, Chief Secretary, Government of Mizoram, Pu Anil Shukla IPS, Director General of Police, Mizoram, Pu Mahaveer Singhvi, IFS, Joint Secretary, New, Emerging and Strategic Tech. [NEST] Division, Ministry of External Affairs, Government of India, Pu Puneet Yadav, IAS – Additional Secretary, Department of Administrative Reforms & Public Grievances, Government of India leh Pu Lokesh Lohiya, Head – State Governments and PSU, Google Cloud ten thu an sawi bawk.

A hawnna inkhawmah hi Pu Amit Sharma, IAS, Secretary, ICT, Government of Mizoram chuan kaihruaiin, kal khawm te lawmna thu a sawi a. Pu Fahim Hag, Co Founder & Director Alliance, Ilouge Media chuan Digital Transformation Conclave an buatsaih chhan a sawifiah ve bawk.

Chawhnu lamah official leh company mithiam kal khawm te hian digital service hmanga ram tana hmalak theihna sawihona an nei zui a ni.