No.2430/2021-2022

Aizawl the 1st October, 2021: Confederation of Indian Industries (CII) buatsaih East India Summit-2021 hman mekah vawiin kha Mizoram state session ni a ni a. Virtual programme-ah hian Chief Minister Pu Zoramthanga chu khuallian a ni.

Chief Minister Pu Zoramthanga chuan CII in India hmarchhak state-te tan East India Summit a buatsaih chu lawmawm a ti a. Investment ti duhte tan Mizoram chuan potential tam tak a neih thu leh sawrkar pawh a inhawn thu a sawi a. Mizoram economy tihhmasawnna tura kawng hrang hrang a awm thu sawiin Chief Minister chuan Mizoram chu ram la hman tangkai theih tur zau tak, ruahtui duhthusam, sik leh sa nuam tak, thei leh thlai hrang hrang that theihna hmun a nih avangin sector hrang hrangah hmasawnna a awm theih thu leh, sawrkar pawhin theihtawp a chhuah thu te a sawi a. State tlawhpawh harsa tak a nihna chu thlak danglama, tlawhpawh awlsam taka siam theih a nih thu a sawi a. Inkalpawhna hi ngaihpawimawh hmasak ber tur zing a mi a nih thu sawiin, thil thar leh siamchhuah tam deuh nei mah ila, awlsam zawk leh man man zawka thiarchhuah a semkualna tur kawng neihloh chuan a hlawk theihloh thu a sawi a ni.

Chief Secretary Pu Lalnunmawia Chuaungo pawhin he hunah hian thu sawiin, Mizorama investment ti duhte chu rawn zirchiang tura sawmin, investor leh state mipuite tana hamthatna turah chuan harsatna awm thei te pawh sutkian dan ngaihtuah pui turin sawrkar a inhawn thu a sawi a ni.

He hunah hian Pu Abhijit Barooah, CII North East Council Chaorman & Managing Director, Premier Cryogenics Ltd. Pu Abhijit Barooah chuan kaihruaiin, Planning & Programme Implementation Secretary Pu Lalmalsawma Pachuau pawhin thu a sawi a. Mizorama investment tih theihna tur hrang hrang awm te tarchhuahna video presentation thlirho niin, zawhna leh chhanna hun te hman a ni a. P&PI Department Principal Adviser Dr. Lalrinchhana chuan lawmthu sawiin hun a khar a ni.

He East India Summit-2021 hi East India leh North East India a State hrang hrang ten economy leh culture-a inkungkaihna nghet zawk an lo neih theih nana buatsaih a ni a. He hunah hian State thenkhatte economic sector hrang hranga an potential leh an thar chhuahte phochhuahna hun pek an ni a. East India Summit-2021-ah hian Ports, Railways, Aviation leh Future mobilitychu thlurbing a ni a. He East India Summit-2021 in a tum chu India hmar leh hmarchhak hmasawna hrang hrang awm thei te haichhuaha chumi tihlawhtling theitu tur ram chhung leh ram pawna agencies te dap chhuah a ni.