968/2023-2024

Aizawl, 28.06.2023: Chief Minister Pu Zoramthanga chuan tukin khan Sairangah FCS&CA godown thar sakna tur lungphum a phum. Heihi Zuangtuia FCS&CA Godown sawnna tur a ni. Sairang Dinthar a Horticulture Department hmunah kudam sakna tur lungphum phumna pual hian inkhawm tawi buatsaih a ni a. FCS&CA Minister Pu K. Lalrinliana chu khualzahawm a ni.

Chief Minister chuan Sairang Dintharah kudam lian sak a ni tur chu lawmawm a tih thu sawiin, Sairanga rel lu lo lut tur nen awlsamna nasa zawk a thlen ngei a rin thu a sawi. Godown hi sak that a nih hnu ah Zuangtui godown hlui chu tangkai taka hman tum a nih thu a sawi bawk. Tun hma kuma sawrkar tan hmun remchang a la nih theih ringa Sairang a ram sawrkarin a lo neih chu vawiinah a tangkaina hmuh tak zel a nih dan sawiin, chu rama FCI kudam lian tha tak sak mek chu vawiina lungphum phum tak FCS&CA kudam nen inhnaih taka awmin, buhfai phurchhuah a Mizoram hmun hrang hranga sem darh kawnga nasa taka awlsamna a thlen tur thu a sawi a. Heng truck lian kalna in khawpui chhung traffic a tihbuai loh nan a bypass road siam a nih dan tur khuallian hian a sawi fiah bawk a. PM-DeviNE kaltlanga bypass road siam a nih tur bakah tunah hian Aizawl chhim lam atanga Mizoram hmar leh khawchhak lam panna tur ruahmanna siam mek a nih thu a sawi bawk. Chief Minister chuan Mizoramin hamsawnna tura potential / theihna tha tak a neih hi haichhuah dan thiama hmathlir thui tak neih pawimawh a tih thu a sawi a. Tum sang tak leh lian tak neih pawimawh a tih thu a sawi a. Mizoramin tunhnaia harsatna hrang hrang a tawhte chu nasa zawka hmasawn na tur atan chona ah lak ni se a ti a ni.

FCS&CA Minister Pu K. Lalrinliana chuan Zuangtui godown chu mipui tam zel leh khawpui thang zel avangin sawn a tul tak thu leh, Sairang Dinthara hmun tha neih hmuh a ni chu alwmawm a tih thu a sawi a. A chhak chiah ah FCI Godown sak mek a ni chu lawmawm a tih thu sawi bawkin, hei hian Tanhril FCI godown atanga FCS&CA department godown a man to tak tak a buhfai phurhnaa sum sen ral thin kha a hum tur thu a sawi. Minister chuan Sairang a godown sakna tur hi tihlawhlting tura sawrkar hotulu te thahnemngaihan te leh khawtlang mipuite tawiawmna chungah alwmthu sawiin, a sak hna thawktu PWD leh an hnuaia contractor te chu theihtawp chhuah hna tha tak chhuah tura a beisei thu a sawi bawk.

He programme hi FCS&CA Secretary Pi Teresy Vanlalhruaii chuan kaihruaiin, Er. B. Lalawmpuia, Engineer-in-Chief chuan kudam sak dan tur report a pe a ni.

Godown sakna tur hi thuang hnih - SASCI leh NABARD atanga sum hmuh a sak tur a ni a. SASCI 2022-23 atangin Rs. 9,21,07,000 sanction niin building zau zawng hi a vaiin 1220.86 sqm a ni a, buhfai 1500 MT a leng dawn a ni. Building hian verandah (1002.75 sqm) leh loading & unloading shed (218.11 sqm) a huam tel dawn a, approach road siam te, lui kam lung rem te, leivung hnawhkhah hmanga parking area siam leh thildangte a tel bawk.

NABARD atanga sum sanction chu Rs. 4,85,94,000 niin hna hmingah "Construction of Warehouses with Associated Infrastructure in Mizoram" tih a ni a. Godwon pahnih 1000MT  dawl zo ve ve sak tur niin, godown zau zawng hi a pumin 1671.76 sqm a ni thung. Staff quarter pawh a tel bawk ang.