3283/2023-2024

Dated Aizawl, the 9th January, 2024: Vawiin khan Chief Minister Pu Lalduhoma chuan a pisaah Foundation for Drugs Free Mizoram hruaitute kawmna a nei a, an hmalak dan hrang hrang te a ngaihthlak sak.

Chief Minister chuan, sawrkar tanpuina tel lova member inphalte thawhkhawm liau liauva hmalakna tha tak tak an kalpui avangin lawmthu a sawi a. An hmalakna ten rahtha a chhuah ngei a beisei thu hrilhin zau zawka hma an lak zel theihnan duhsakna a hlan a. Ruihhlo ngaite chhanchhuahna tur atana sawrkarin hma a lak tawh chinte pawh a hrilh a ni.

Pu V. Lalnunthara, President, Foundation for Drugs Free Mizoram chuan an hmalakna tlangpui a sawi a. An pawl hi kum 2019 a ding an nih thu leh ruihhlo ngai tawh te enkawl lam aimahin tleirawl la fihlim mek te ruihhlo bawiha an luh loh nana invenna lama an beih nasat zawk thu a sawi a. An pawl member te thawhkhawm sum hmangin mithiam zawkte sawmin Team of Resource Persons an din a, anni hmang hian kum 4 chhungin School leh kohhran hmun 66 tlawh tawhin; tleirawl mi 12,500 te ruihhlo laka fihlim turin signature card ah an lo intiam tawh a ni.

He pawlah hian Pu Lalduhoma hi kum kalta atangin Patron Member a lo ni tawh a, an Patron member Chief Minister ni ta an lawmpuizia entirnan thilpek an hlan nghe nghe a ni. Tunah hian member 950 an awm mek a, an zingah hian MLA nilai 11 an tel a ni.