Govt. Serchhip College Academic Building thar, RUSA (Rashtriya Uchchattar Shiksha Abhiyan) hnuaia sak chu vawiin khan Chief Minister Pu Lal Thanhawla chuan a hawng. Chief Minister hi School Education Minister Pu H. Rohluna chuan a tawiawm a ni.
Chief Minister chuan Serchhip district leh Serchhip mipuite tana hmasawnna tangkai tak tur kan hawng thei hi a lawmawm a, a hlawhtlinna atana thawktute zawng zawng chungah pawh lawmthu ka sawi a ni, a ti a. Khawvel ram changkang apiangin hriselna inenkawlna (health care) leh zirna (education) an ngaih pawimawh thin thu leh, India ramah pawh tun hnai maiah hengah hian hmalakna thar tha tak tak siam a nih thu a sawi a. Mizoram pawhin hman atang tawha zirna tihhmasawn leh state dangte el pha tura education reforms siam tura ruahmanna a lo siam tawh thu sawiin Chief Minister chuan vawiinah Higher Education tihhmasawnna tur hmalakna thar hawn a ni leh chu a lawmawm a ni, a ti. Thalaite tana khawvel thar siam tura sawrkarin kawng hrang hranga a hmalak dan te sawiin Pu Lal Thanhawla chuan zirna lamah te, army leh civil service coaching class te, skill development te leh cash award buatsaih te chu tuna zirlaite chu a hmang tangkaitu an nih ngei a duh sak thu a sawi.
Chief Minister chuan Mizoramah lehkhathiam tam viau mahse mi hmantlak leh chhawrtlak tam zawk nei tura hmalak a la tul thu a sawi a. Tum mumal tak nei a, mahni tum tihlawhtling tura taimakna leh tumruhna pai tel a tul thu a sawi. CM chuan All India Service lamah an kal a nih loh chuan thalaite tan state chhungah chuan sawrkar hna a tlem tawh thu sawiin, chung avang chuan thalai lehkhathiam leh mahni tuina bik leh thiamna bika kal duh tan te, entrepreneurship lama tui tan te Capacity Development leh Entrepreneurship Development Scheme kalpui mek a, thalai engemawzah an pen chhuah tawh thu a sawi a. India pum huap zirna in - National Institute of Technology te, Indian Institute of Mass Communication te Mizoramah a awm tawh chuan lawmawm tiin, India rama zirlai hmeichhia luh theihna Sainik School hmasa ber Mizoramin a neih te chu hman tangkai a, sipai nih tum kherlo tan pawhin khua leh tui tha ni tura inzirtirna hmun tha a nih hrim hrim thu a sawi bawk. Chief Minister chuan hmasawnna atana building thar siam te chu a hmangtuten dimdawi leh fai taka neitu rilru pu theuh chunga an enkawl tlan a beisei thu a sawi bawk.
School Education Minister Pu H. Rohluna pawhin thu sawiin, Govt. Serchhip College chu Mizoram college upa ber pali zing ami anih angin entawntlakna tur tam tak an nei nia a hriat thu leh, building thar an nei chu a lawmpui thu a sawi a. Minister hian sawrkarin zirna lama nasa taka hma la in, infrastructure development lamah te, syllabus leh reading materials te, facilities changkang thei ang ber te ngaihtuah a hma a lak thu a sawi a. Zirna chu a hniam ber atanga a sang ber thlenga ram hmasawnna atan pawimawh ber zing ami a nih avangin ngaihthah chi loh niin, zirchhuak tawhte tan pawh hna than an hmuh theih nan skill development lamah te, entrepreneurship development lamah te man tlem te a zirtirna tha tak pek zel a nih thu a sawi a ni.
Vawiina Serchhip College building thar hawn tak hi RUSA Phase-I hnuaiah 2013 kum tawp lam atang khan Serchhip College tihhmasawnna tura hmalak tan niin, Mizoram Technocrats Company chuan Academic Building sakna tur ruahmanna an siam sak a. July 2015 khan installment hmasaber (Rs. 12,50,000) hmangin ground floor sak a ni a. April 2016 khan installment pahnihna (Rs. 93,75,000) pek leh niin, classroom pahnih leh mipa leh hmeichhe inthiarna sak a ni. April 2017 khan heng classroom te hi luah nghal a ni a. Installment pathumna (Rs. 93,74,952) hmangin vertical extension siam a ni a, classroom pahnih sak belh leh a nih bakah Multipurpose Hall cheithat nan sum hi hman a ni a. Building hi metre 27.5x10.8 a zau a ni a, hnathawh hi kumin June thla khan zawh fel a ni. Tunah hian RUSA phase II kalpui leh mek niin, hemi hnuaiah hian Library Extension te, Seminar Hall leh academic building thar sak hna thawh leh mek a ni bawk.
Building thar lawmna inkhawm, HD Rosanga Multipurpose Hall-a buatsaihah hian Pu Vanlalchhuanga, Associate Professor chuan kalkhawmte lawmna thu a sawi a, Dr. Lalrintluanga Sailo, Institutional Co-ordinator RUSA chuan Technical Report a pe a. Pu Thanglura, Addl. State Project Director, RUSA hnen atangin thusawi ngaihthlak niin, state dangten RUSA project an kalpuina state in a tum ve tur (State Matching Share) ah harsatna an tawh thin laia Mizoramin buaina a tawk ve ngailo chu lawmawm a tih thu a sawi. Inkhawm hi Dr. C. Sangluaii, Govt. Serchhip College Principal in lawmthu sawiin a khar a ni.
Vawiin programme-ah hian School Education Commissioner Pi Esther Lalruatkimi, Serchhip DC Pi Sangchin Chinzah, SP Pu R. Sathiyasundaram leh Serchhip district office hotulu hrang hrangte bakah khawtlang leh tlawmngai pawl hruaitute an tel bawk a ni.
