Nimin khan Aizawl Bawrhsap Dr. A. Muthamma chuan EVM-VVPAT Awareness Campaign TNT (Thutak Nunpuitute Team), Zuangtui-ah a hmanpui. Addl. DC Dr. Lalhriatzuali Ralte chuan Aizawl Bawrhsap aiawha thu sawiin, kum 18 tling India khua leh tui chuan vote thlak ngei tur a ni, a ti a. Mizorama Inthlanpui lo awm tura Election Commission-in a ngaih pawimawh em em chu mi zawng zawngin vote kan thlak theihna tur ruahman hi a ni, a ti a. Chung zingah chuan taksa lama harsatna neite tan Polling Station zawng zawngah Ramps (Kailawn), Wheelchair, Khaw hmu thei lo te tan awlsam turin khawih a hriat hran theih tur chhut pawn (Braille Enabled EVM), Booth Level Volunteers te a awm dawn a ni, a ti a.

Dr. A.Muthamma chuan taksa lama harsatna neite hnenah Vote thlak tura Ngenna lehkha pekna hun a nei bawk a ni.

He hunah hian SVEEP Nodal Officer Pi Angela Zothanpuii chuan EVM-VVPAT chungchang zirtirna leh hmandan hrilhfiahna hun a hmang a. Nl. R. Vanrammawii, Aizawl District PWD (Persons with Disabilities) Icon pawhin thusawiin, harsatna chhuanlama hmangloin, vote thlak ngei turin taksa lama harsatna neite chu a sawm a ni.

Vote nei tawhte leh kum reilotea vote nei turte hnenah EVM-VVPAT hman chinna hun hman a ni bawk a ni.