Chief Minister Pu Lal Thanhawla chuan nimin khan Local Administration Department (LAD) hmalaknaa Lallianvunga hmunah Hmuifang Park Rs.158.83 Lakhs senga siam chu a hawng. Pu P.C.Lalthanliana, LAD Minister-in Rest House leh Cabin a hawng ve thung a ni.

Chief Minister chuan sum ngainatna avang leh kuttlinglo pawha sum lak duh tam tak kan awm laia sorkar leh mupui tan, he park siamna tura phal taka ram petute hnenah lawmthu a sawi a. A thlawna sorkar leh mipui tana ram pek hi Mizote zingah chuan thil vang tawh tak a ni a ti. Pu Lal Thanhawla chuan sum ngainatna leh kuttlinglo pawha sum lak hrehlo kan awm avangin Tuirial Hydel Project chu a chhe lailet der a, Sairang thlenga rel kawng siam tur pawh a khawtlai phah nasa hle dawn a, chhim lamah Bay of Bengala chhuahka kan neihna tura motor kawngpui siam hna kal mek, Kaladan Multi Modal Transit Tranport Project pawh tih khawlai hle a ni bawk a ti a. Hetiang renga kan awm anih chuan hmasawnna tur project lo awm turte pawh a hlen chhuah theih lovang tih a hlauhawm hle a ni a ti.Chuvangin Mizote hian rinawmna, dikna , taimakna leh Pathian tihna nung kan mamawh ber a ni a ti.

Chief Minister chuan Sialsuk leh Thenzawl tlangdungah, Hmuifang Parkte nena inthluzawmin Tourist Circuit siam tum anih thu a sawi a. Thenzawla Golf Course siam tum pawh khualzin mite hip nana kmalakna pakhat a ni a ti. Hmuifang Park hmangtu tur zawng zawngte chu faina leh thianghlimna ngaipawimawh tura chahin, kan hman dan atangin kan mizia a lang ang a ti.

Khualzahawm bialtu MLA Pu K.S.Thanga, Parliamentary Secretary chuan park hi intihhlimna chauh nilo, Pathian thu lam thlenga hah chawlhna hmun atana remchang tak a ni a ti.

Hmuifang Park hi kum 2010 June thla atanga cheibawl tan a ni a, a zau lam hi 58.95 Bigha a ni. Rest House leh Cabin bakah rest shed 5, suspension bridge 4, khaw thlirna Viewing tower metre 15a sang te, tree house, flower bed, vantlang inthiarna 3, rcc bench 11 leh adang engemawzah a awm a ni. Park luhna man siam a ni a, puitling tan Rs.10/- leh naupang Rs.5/- a ni a,cafetaria awm bawkin, rest house leh cabinte hi man chawia hman theih ani bawk.

Hawnna inkhawm rest house porch-a neih hi Pu P.C.Lalthanliana, Minister of State for LAD in a kaihruai a, Pu K.Lianzuala, Chaiman, KVI Board in a hmanpui bawk a ni.