896/2023-2024

Hnahthial, 23.06.2023: Chief Minister Pu Zoramthanga chuan vawiin khan Hnahthial ah PWD Division Office, Executive Engineer thuthmun tur chu a hawng a. Bialtu MLA Dr. R. Lalthangliana, Health Minister chu khualzahawm a ni.

Chief Minister hian PWD IB thin, tuna EE office ni taah chuan division thar hawnna lungphun khuhhawnna neiin, Hnahthial Electric Veng Community Hall ah inkhawmna neih chhunzawm a ni.

Thu sawiin Chief Minister Pu Zoramthanga chuan district a lo phuisui zawk theihna tura hlawhtling taka hmalakna chu lawmawm a tih thu sawiin, mipui mamawhna leh mipui rawngbawl kawngah hmasawnna nasa zawk a thlen ngei a beisei thu a sawi. Ram inrelbawlna tha zawk a thlen theih nan a district siam belh a nih dan leh thuamthatna tura hmalakna te a sawi bawk a. Chief Minister chuan sawrkarin a hmachhawp te tihlawhtling tura theihtawp a chhuah thu te sawiin, tikhaihlaktu harsatna hrang hrang awm chung pawhin hmasawnna tam tak hmuh tur a awm thu te, neitu rilru pu a, hnam hmangaihna nen chuan hmalakna tha siam zel a pawimawh thu a sawi.

Chief Minister chuan Mizoram hun kalta te sawiin, rambuai te paltlangin, theihtawp chhuah a tanrualna avangin, remna leh muanna neih a nih tak dan te, chu chu hmang tangkaia ram nuam leh entawntlaka kan ram hi siam tur kan nih dan te a sawi a. Mizoram hi hnamdang laka zahawma a awm theih nan leh Mizo kan nihna zahpuiawm a nih lohna turin malsawmna haichhuah tur a awm tih hria a ram hmangaihna nen hma lak ho puiah mipui leh thalai pungkhawmte a sawm a ni.

Khualzahawm Dr. R. Lalthangliana chuan district ah hmasawnna nasa tak hmuh belh zel a ni chu lawmawm a tih thu a sawi a. Mizoramah district 11 awmtura hma lak a nih dan sawiin, kum 2019 a district pariat awm sa bakah pathum puan belh a nih dan te leh thuamtha a tiphuisui tura sawrkarin chak taka hma a lak zui dan te a sawi a. Minister chuan hripui leng, raltlan, ran hri leh harsatna hrang hrang tawrhna karah sum indaihlohna awm chung pawhin district tharte ngaipawimawh a sawrkar hmalakna chu lawmawm a tih thu a sawi a. Harsatna tam tak kara district tan sawrkari hma a lak dan hrang hrangte sawiin, tun dinhmunah Hnahthialah chuan district office hrang hrang siam a hawn a nih tawh bakah tun hnai maia hawn hmabak pawh an awm thu a sawi a. District thar mai bakah state pum huapa hmasawnna ruhrel lian tham tak tak hawn theih mai leh ruahman mek te - health lamah te, inkalpawhna leh eizawnna kutkawih kawngah te a awm thu Health Minister chuan a sawi bawk.

Inkhawm kaihruaitu Hnahthial DC Pu R. Lalremsanga chuan kum 2019 a district puan a nih atangin Hnahthial district chu tichangtlung tura state sawrkarin hma a lak danah lawmthu sawiin, office thenkhat ti changtlungin, thenkhat a thara din te a nih chhoh dan a sawi a. PWD Chief Engineer ( Building) Er. B. Lalawmpuia chuan report pe in, vawiina Hnahthial Division neih a nih theih nan a sawrkar hotulu te hmalakna chungah lawmthu sawiin, National Highway Division IV ni thin, chhim lama national highway hrang hrang enkawl hna thawk thin chu NHIDCL te lo luh hnuah hna chanpual te pawh thlakdanglamin Lunglei Road Division II ah leh niin, vawiin atang hian Hnahthial Division a lo ni ta a ni a ti.

He office ah hian EE pakhat, SDO pathum leh staff dangte an awm dawn a ni. Inkhawm hi PWD Engineer in Chief Er. Vanlalchhuana chuan lawmthu sawiin a khar a. He hunah hian Hnahthial SP leh district a office hrang hrang hotute, Aizawl leh Lunglei PWD hotute leh a dangte an tel a ni.