897/2023-2024

Dated Aizawl the 23rd June 2023: Vawiin khan Deputy Chief Minister Pu Tawnluia'n Tuikual North-ah Multi Utility Cum Convention Centre lungphum a phum.

He lungphum phumna puala inkhawmtawi, MICE Tuikual North a buatsaihah hian Deputy Chief Minister Pu Tawnluia chuan thu sawiin Aizawl-ah infrastructure lama development hrang hrangte chu duhthusam nimahsela ,a ram leilung khat lutuk leh hmun chep ta lutuk avangin duh angin hmasawnna kalpui a ni thei thinlo a ni, a ti. Amaherawhchu heti a ni chung hian, hmun awl tuaihnum tur a awm a nih chuan sawrkar chuan hma a lak thuai zel a beisei thu a sawi.

Pu Tawnluia chuan Multi Utility Centre sak a nih theih nan bul tan tu pawimawh tak Lok Sabha MP Pu C Lalrosanga leh Planning Department changtu Chief Minister chungah a bik takin a lawm thu a sawi a. UD&PA chu 2006 atang chauh a Department ding tan ni mahse Aizawl khawpui cheimawi leh tuaihnum nan nasa takin hma an lak tawh thu sawiin tun dinhmunah pawh Smart City Kaltlanga Project lian tham tak tak kalpui a lungphum phum zel a nih thu a sawi. Aizawl in Urban Development kawnga hma a lakna ah khawpui chhung lirthei veivak tawt ta lutuk sutkianna tura Parking space siam chu a ngai pawimawh hle a ni, a ti a, Tuikual North Multi Utility Convention centre-a Parking space a awm tur pawh chu lawmawm a tih thu a sawi bawk.

Deputy Chief Minister chuan Multi Utility Convention centre sak tura Contractor-te chu felfai taka Advisory Board in a thlan chhuah annih anga hna thawk turin a hrilh a, Veng chhung hruaitute leh kalkhawmte hnenah pawh Multi Utility Centre chu sak zawh a nih hnu ah pawh duat taka enkawl zui turin a ngen a ni.

I&PR Minister Pu Lalruatkima pawhin thu sawiin Deputy Chief Minister kaihhruaina hnuaiah Aizawl khawpui in nasa takin hmasawnna a hmuh thu a sawi a, Project hlawhtlin theihna tura hma la tu Lok Sabha MP, Planning, UD&PA leh khawtlang hruaitute hnenah lawmthu a sawi bawk.

I&PR Minister chuan Multi Utility Convention centre Project lungphum phum tak chu multi purpose anih ang taka Tuikual North in a mamawh tak khelmual- Futsal Ground, Market shed,Parking, restaurants leh conference hall-te awm tura duan a ni chu Tuikual North leh Veng thenawm Dinthar te thleng a an chhawr theih tur a ni, a ti.

He Project bakah hian hmalakna dang hmachhawp a awm nual thu sawiin Storm drainage; JL thlang atanga Ebenezer thleng kal thei tur a ruahmanna pawh bawhzui mek a ni, a ti a. Minister chuan kalkhawmte hnenah hmasawnna chi hrang hrang te chu dimdawi leh duat taka neitu thinlung pu a enkawl turin a chah a, kawng engkim ah Mizo identity - rinawmna , tlawmngaihna leh huaisenna khawi hmunah pawh chhawm nung zel turin a fuih bawk a ni.

Pu C Malsawmna,EE ,UD&PA in technical report pein Multi Utility Cum Convention Centre Project chu NEC atanga hmuh niin, Planning and Programme Implementation Department chu Nodal Department niin UD&PA chu implementing agency anni a. Futsal ground bula sak tur Building hian chhawng 3 a nei anga, Restaurant, Vegetable Market, Conference Hall leh Parking lot te awm thei tura duan a ni, a ti a, a kalpawhna (approach road ) pawh RCC Balcony a thawh tan mek a nih thu a sawi. A sakna man tur - Project cost hi cheng nuai 299.91 a ni.

He Multi Utility Cum Convention Centre lungphum phumna puala inkhawmtawi buatsaih hi Pu Lalmalsawma Pachuau, Secretary, Planning and Programme Implementation Department in kaihruaiin , Deputy Chief Minister leh I&PR Minister bakah Pu R . Thanglura, Deputy Mayor AMC, Pu H Lalramzauva, Tuikual North Local Council Chairman leh PS to Lok Sabha MP Pu C Lalrosanga ten thusawina an nei a; Pu C Lalrosanga PS hian MP chibai bukna lehkha chhiar chhuah na a nei bawk. Heng tarlan bakah hian UD&PA Officers leh staff, Kohhran leh khawtlang hruaitute, NGO pawl hrang hrang leh sawmbik mi pawimawhte an tel a , Pu H Lianzela, UD&PA Director in lawmthu sawina neiin lungphum phumna hun hi khar a ni.