Vawiin khan Chief Minister Pu Lal Thanhawla chuan Central YMA leh Art & Culture Department tangkawpte buatsaih Hnam lam intihsiakna – 12th Chief Minister’s Running Trophy in YMA Cultural Dance Competition 2016 chu Lammual-ah a kharna leh lawmman semna programme chu khuallian niin a hmanpui a, he programme ah hian Art & Culture Minister Pu R. Romawia chu khualzahawm a ni a, Parliamentary Secretary Pu H. Zothangliana pawhin he programme hi a hmanpui a. Branch YMA ti tha te hnenah lawmman an hlan bawk a ni.

Chief Minister Pu Lal Thanhawla chuan mahni culture hi zahpui chi leh thansan chi a ni lova, kan chankan chhoh ang zelin hengte hi kan ngaihsanin kan chhawmnung zel tur a ni, a ti a. Zo nun zemawi tungdintu leh chawisangtu leh thalai te kaihruaitu YMA chunga lawmthu sawiin kan hnam hi kan tluk chhiat loh nan theihtawp chhuaha kan tan tlan a ngai a, hemi kawngah hian thalai kaihruaitu leh Sawrkar pawh thurawn pe a, kawng engkima thawhpuitu YMA hi an pawimawh em em a ni, a ti. Ram leh hnam tana tha tur, thing leh mau humhalh a ni emaw, nungcha humhalh a ni emaw, mi pamham thenkhat ten gas an tihchingpenna dona a ni emaw, theihtawp chhuaha tha taka Sawrkar min thawhpui avangin lawmthu ka sawi a ni, a ti.

Pu Lal Thanhawla chuan khawtlang nun siamthatna kawngah te leh ram leh hnam siamna kawngah ram leilung fate tumah kan bang lova kan zavai mawh a ni a, a chhiat leh a that ah mawh kan phur vek a, heng kawnga YMA hmalakna tichak turin YMA Branch tin te in pawimawh a, heng mawhphurna hlenchhuaka tichak turin Branch tinte ka chah duh che u ni, a ti a. Tanrual chu chakna anih thusawin kan zavaia kan tanrual chuan hnam zahawm leh hnam ropui kan ni thei ang a tiin hnam ziarang hrang hrangte chhawmnung a, chawivul a, a siam thatna lai tur a awmin siam tha a kal turin YMA member zawng zawngte ka chah duh che u ni a ti.

Art & Culture Minister Pu R. Romawia pawhin thusawiin kan hnam ziarangte hi Zofate dinchhuah emaw siam emaw a nilova, hnam anga Pathian-in min siama min pek a ni a, kan zahpui tur a ni lova, a parvul zel nan theihtawp kan chhuah a ngai a, mahni hnam ziarang zahpui te chu hnam ropui an ni ngai lo a ti. Zofate hi khawvel khawi hmunah pawh awm ila, kan tawng, kan hnam lam leh kan sakhua te hi kan humhim zel tur a ni, a ti bawk.

12th Chief Minister’s Running Trophy in YMA Cultural Dance Competition 2016 kharna programme hi Pi Thanhliri Pachuau, Secretary, Art & Culture Department in a kaihruai a, CYMA, President Pu Lalbiakzuala pawhin thusawina hun neiin Pu M.S. Ralte, Secretary, Cultural Sub-Committee, CYMA in Report pekna leh result puanna hun hmangin Pu J. Lalsailova, Treasurer in lawmthu sawiin hun a khar a ni.

12th Chief Minister’s Running Trophy in YMA Cultural Dance Competition 2016 hi nimin ah tan niin Intihsiaka tel thei turin Branch YMA 56 ten huntiam chhungin hming an pe a. Harsatna hrang hrang avanga a taka tel leh thei lo Branch YMA an awm nual a, intihsiaka tel Branch chu 38 an ni ta a. Intihsiak a tel Branch YMA 38 atanga Branch 4 chu Aizawl pawn lam atangin an ni a, Chungte chu - Saipum Branch YMA, Thingsulthliah Hospital Area Branch YMA, Chhingchhip Mualpui Branch YMA leh Champhai Kannan Branch YMA te an ni.

Kumin ah hian hnam lam pathum – Cheraw (Kantluang), Chawnglaizawn leh Tlanglam te a intihsiakna neih a ni a. A pumpuia titha ber (Champion) chu Ramthar North Branch YMA niin a dawttu (Runners Up) chu Vaivakawn Branch YMA an ni a. 3-na atanga 10-nate chu (indawtin) – Chaltang North Branch YMA, Champhai Kanan Branch YMA, Chanmari Branch YMA, Armed Veng Branch YMA, Armed Veng South Branch YMA, Ramhlun South Branch YMA, Durtlang Branch YMA leh Govt. Complex Branch YMA te an ni a. Branch YMA member tel tam ber chu Lungleng I Branch YMA Member 33 an tel a, an ni hi Director’s Award hlan an ni.

Cheraw ah 1-na chu Ramthar North Branch YMA niin 2-na chu Vaivakawn Branch YMA niin 3-na chu Armed Veng Branch YMA an ni a. Chawnglaizawn ah 1-na chu Ramthar North Branch YMA niin 2-na chu Vaivakawn Branch YMA niin 3-na chu Chaltlang North Branch YMA an ni a. Tlanglam ah 1-na chu Ramthar North Branch YMA niin 2-na chu Vaivakawn Branch YMA niin 3-na chu Chanmari Branch YMA an ni.

Chief Minister Running Trophy in YMA Cultural Dance Competition hi kum 1993 atanga neih tan niin, kum khat dan zelah neih a ni thin a. Intihsiak neih hnuhnun ber kum 2013 khan September ni 5 leh 6 ah neih a ni a. Cheraw (Kantluang), Khuallam leh Chai te a intihsiak a ni a. Kha mi tum khan Ramthar North Branch YMA chu Champion-in, Chanmari West Branch chu Runners-Up an ni. Pathumna chu Chanmari Branch YMA te an ni.