Vawiin chawhnu khan Chief Minister Pu Lal Thanhawla chuan Rashtriya Uchchatar Shiksha Abhiyan (RUSA) sum, Rs.140/- lakhs senga sak that, Golden Hall, Conference Hall, Practical rooms leh  Class room te chu a hawng. 

Chief Minister Pu Lal Thanhawla chuan RUSA sum tha taka hman a ni leh zirlai te tana tangkai tak tur ruhrel pawimawh tak tak siam nan awmze nei taka hman a ni chu lawm awm a tih thu a sawi a. Sawrkar in Central atanga hnathawhna tur sum a hmuh ang ang te chu a nihna tur ang taka hman a nih chuan a hlu thin hle a; kutlinglo a sum hmuh tum tu te an inrawlh erawh chuan a nih tur ang a ni thin lo a ni a ti. 

Compensation avangin hmasawna  ruhrel buatsaih kal mek te a lo chawl fo thin a, ram a than muan phah fo thin a,  a pawi hle a ni a ti a. " Nangni zirlai te hi, kan ram thanmawh bawk te thianfai tur leh a chhelai siamtha tura kan inghahna te in ni a. Nakin lawka kan ram hruaitu tur te in ni tih leh ringawt erawh a dik lo thung.  Mi hlawh tling ni tur chuan nu leh pa thu awih leh chawimawi a ngai a;  Mizo kan nihna anga kan zawm a mawi , Zonunmawi nunpui leh aia upa zah nachang hriat te a ngai a. Chung thil zawm thin te chu, khaw tin, vengtina mihlawhtling kan hmuh te hi an ni a. Tuna nundanmawi kan sawi zawm chho mek zirlai, thalai, naupangte chu naktuk naktip a ram hruaitu leh sakhaw hruaitu pawimawh te an ni dawn a ni ", tiin Chief Minister chuan zirlai te tan hlawhtlina nia a hriat te a sawi a ni.

A chhe lai apianga hmahruaitu nih chu thil mawi lo tak a nih avangin zirlai, thalai lehkha thiam theihna sang tak nei te chuan siamthat hna thawk in an nu leh pa te finchhuah tu an ni pawh a tul a ti a. Vaihlo leh a kaihhnawih, zuk leh hmuam bakah damdawi hmansualna lakah te Mizo thalai te an fihlim leh an harh thar a ngai a. Thianghlimna kawngah te, thil tum mumal tak neih intihhmuh kawngah te, mahni kutke a din leh midang te tana eizawnna siamsak tuma hmalak kawngah te intlan siak   leh hriselna kawnga in tiphur tawn tura thalai ten tan an la a nih phawt chuan, Mizoram, mi tlemte chenna hi Model State ah siam theih tih a chiang a ti.

Mizoram tan awmze neia an tan angai a, tharum leh pawng nekna hmanga hmalak ringawt chuan state mipui  tan thil tha a thlen dawn lo a ti a. India rama cheng te chuan Indian Nationalism chu an Nationalism ah an pawm a ngai a. Mahse,  rampawn mi khua leh tui chanvo chuhtu te chu remchanna siam sak tur a ni lova.  Hnamah leh hnam thilah  phei chuan  chian hle a ngai thung tih sawiin thluak hmanga mi dang te khum tum leh thiamna hmanga mi dang te awptum a ngai a ti.

Hrangbana College Golden hall leh Classroom  hawnna programme-ah hian Higher & Technical Education  Pu R. Romawia chu khualzahawm a ni a. RUSA hmalakna leh Mizoram College a hmalakna hrang hrang te  a thusawina ah a tarlang a. Inkhawm hi  Higher & Technical Education Commissioner/Secretary  Pu Benjamina'n a kaihruai a. Dr. KL Pradhan, Member Secretary, State Higher Education Council in Report a pe a, Pu Lal Rinawma, Principal, Govt. Hrangbana College in lawmthu sawiin hun a khar a ni. 

Report a tarlan dan chuan Hrangbana College Golden Hall len zawng hi a dung feet 88.11, a vang Feet 60 a ni a, Hall chhunga dawhsan  len zawng chu A dung feet 57, a vang feet 14 a ni thung.           Kum 1980 a din HBC hi NAAC in kum 2011 khan Grade 'A' a pek a ni a. Tunah hian zirtirtu 74, thawktu dang 19 nen an vaiin mi 93 staff an ni a. College building ah hian class room 19 awm mekin, zirlaite hi section 24 ah zirtir mek an ni a. Kum in hian zirlai 1758 awm mekin heng zinga 1386 hian Arts subjects an zir a. Kum 2017 Mizoram University exam result chhuak ah HBC hian Top 10 a pass zirlai 38 lai an nei a ni.