Vawiin chawhnu khan Lunglei District huamchhunga malaria natna do kawnga hmalakna kal mek leh hmachhawp hrang hrang sawiho turin District Task Force and Committee for Malaria Elimination chu an Chairman Lunglei DC, Pi Lalzarmawii, IAS hovin a office chamber-ah an thukhawm. Meeting-ah hian Line Department hotute bakah YMA, MHIP, MUP aiawhte leh Christian Hospital, Serkawn leh John Williams Hospital hotute an tel a ni. 

Pi Lalzarmawii chuan hmawsawnna tluantling leh ngelnghet tak nei tur chuan mipuite hriselna a pawimawh hmasa a ni tiin hemi kawnga kan hmabak lian tak chu malaria natna um bo hi a ni, a ti a. Malaria natna do tur chuan kan in leh lo leh kan chheh vel fai taka kan enkawl a tul a ni tiin Pi Lalzarmawii chuan thosi inthlahpung zel tur ven kawngah leh mipuite rilru sukthlek kawngah tun aia chak zawka hmalak tul a tih thu a sawi a.  Lunglei District chu malaria vei tamna district “High Endemic District” te zinga mi a nih avangin he natna do tur hian Line Department-te leh tlawmngai pawl te leh mitin ten mawhphurhna kan nei a ni tiin thawhho puiah Lunglei DC chuan a sawm. 

Vawiin meeting Dr VLMS Dawngliana, CMO leh Member Secretary ni bawk kaihhruaiah hian Pi Josephine Lalramthari, DVBD Consultant chuan malaria do kawnga Lunglei District huamchhunga hmalakna sawifiahna hun a nei a. Kumin January thla atanga July thla chhunga mi 18,239 thisen test tawh zingah mi 810-te chuan malaria an vei tih hmuhchhuah a ni a, heng malaria vei te zinga mi 705 hi Malaria Pf vei an ni (Malaria Pf % -87.03) Health Department-in thosi tihlum thei damdawia chiah sa thosilen – Long Lasting Insecticidal Net (LLIN) kum 2016 atanga an sem chhuah atangin nasa takin malaria natna a tlem tih tarlan a ni a.  Lunglei District huamchhunga mipui cheng zat atanga chhutin mi 1000 zela kum khat chhunga malaria natna vei zat (Annual Parasite Incidence -API) leh malaria natna vanga boral zat te chu:

 District Task Force and Committee for Malaria Elimination- hi malaria natna do kawnga sawrkar laipui hmalakna thar pawimawh tak ‘National Strategic Plan: Malaria Elimination in India 2017-2022’ thil tumte ti hlawhtling tura din a ni.