476/2023-2024

Aizawl 17^th May 2023: Vawiin khan, Mizo Zirlai Pawl (MZP)-te buatsaihin Mizoram Board of School Education (MBSE)-in High School Leaving Certificate (HSLC) result a tihchhuah  top 10-a Mizo tlingte chawimawina chu Vanapa Hall-ah neih a ni a, he hunah hian Chief Minister Pu Zoramthanga chu khuallian niin a hmanpui.

Chief Minister chuan HSLC topper-te chu a lawmpui thu a hrilh a; tun tuma hlawhtlinna an chan chu duhtawk mai lova, zirna sang zawk an zir hunah theihtawp chhuah zui zel turin a fuih a ni. Vawiina chawimawina dawngtute leh zirlai dangte pawh theihtawp an chhuah chuan Mizoram mai nilo India ram pumah pawh a ber thleng phak an nih theih thu a sawi. Eizawnna kawng zawhnaah tuina, thiamna leh theihna a inan vek theihloh thu sawiin, eng kawng pawh zawh ila, mi tangkai ber ni thei tura inzir leh thawhrimna a pawimawh hle a ni,a ti.

Khuallian chuan khawvel sualna hrang hrang kara seilian zel tur an nih thu tarlangin a bik takin zu leh ruihhlo laka fihlim tum turin zirlaite chu a chah a. Zirlai tan phei chuan taksa bakah rilru leh ngaihtuahna tichhetheitu a ni a, sang tak thleng thei kha hniam taka dahtu a nih avangin tlansan ngam a ngai a ni, a ti. Zu leh ruihhlo hian khawtlang nun a tiralmuang lova, nu leh pa tan mittui tlakna thlen fo tu a ni tih hria a, ruihhlo ti lo tur leh huaisen taka hma lam pan zel turin a fuih a ni. Zirlaite chu ‘talent’ an neih ang ang te hmangthiam turin a fuih a. Eng kawng pawh zawh ila beidawng lova beih a ngai a ni tiin harsatna hrang hrang kara hlawhtlinna chang turin zirlaite duhsakna a hlan a ni.

Pu Zoramthanga chuan thangthar zingah hnam rilru pu an pung chho zel nia a hriat thu sawiin lawmawm a ti a. Khawvel hriata Mizote pho chhuaktu pawimawh tak chu Mizo hnam leh ram hmangaihna (nationalism) hi a ni tiin, ram leh hnam hmangaihna chu uar zawk a kalpui zel turin zirlaite chu a chah a. Hnam rilru pu tur leh Zohnahthlak hnam hrang hrangte inunauna  leh inpumkhatna tura MZP hmalakna chu fakawm a tih thu a sawiin  ‘Zofest’ MZP ten an buatsaih thin chu lawmawma tih thu a sawi bawk a ni. Zohnahthlakte chu tlang dang leh mual hrang hrangah awm mahse, Mizoram chu Zofa zawng zawngte ‘Jerusalem’ a ni tiin hnam ang a dingchhuak zel thei turin Zofa zawng zawngte tan la thar turin  a sawm nghal bawk. 

Vawiina zirlai titha chawimawite hi- chawimawina thuziak leh pawisa fai cheng 5000 bakah pangpar, MZP Sash, MZP Chanchinbu, Zofest-2022 Souvenir leh Pu Lalhmachhuana Zofa lehkhabu ziah- ‘Mizo History Khua’ te pek an ni.

Chawimawina dawngtute chu

1.  Alicia Malsawmsangi (2^nd rank)            St. Paul’s HSS

2. Deborah R.Lalhmingmawii ((3^rd rank)    St.Joseph HSS

3. Lalnunsangi (3^rd rank)                            St.Joseph HSS

4. Vanmalsawmsangi (4^th rank)                  Don Bosco School, Darlawn

5. Esther Tingbiakmuani ((4^th rank)            Bethel Mission School, Champhai

6. Lalremruati (5^th rank)                              AR ELLS School, Aizawl

7. Vanlalrinawma (5^th rank)                         St.Joseph HSS

8. Lalbiakmawii (6^th rank)                            St.Joseph HSS

9. Isabel Daoki (7^th rank)                             St. Paul’s HSS

10. Mary Lalchhanchhuahi (7^th rank)           St.Paul’s HSS

11.Elena lalruatfeli (7^th rank)                        K.D.High school

12.Vanlalhmangaihi (8^th rank)                      St.Joseph HSS

13.Esther Zorinhluzuali (9^th rank)                 St.Joseph HSS

14.R. Malsawmkima (10^th rank)                   St.Andrew’s School, Aizawl 

Zirlai tithate chawimawina hunah hian Pu Lalnunmawia Pautu, President MZP leh Pu John Lalpeka, GIG Motor-te pawhin thusawina hun an hmang a, Pu Jacob Lamuanpuia, Gen.Secretary, MZP chuan report pein, Pu Sanghmingthanga, Treasurer, MZP  chuan lawmthu sawina neiin hun a khar a ni.