475/2023-2024

Vawiin khan Mizoram Samagra Shiksha leh State Level Sports Association hrang hrangte tangkawpa buatsaih 'Grassroot Sports Development Programme State Level Competition 2023' chu Aizawl-ah tan a ni.

Ni thum chhung awh tur State Level Competition thawh khatna Aizawl-a neihah hian infiamna chi thum - Boxing, Badminton leh Weighlifting hmangin District hrang hrang atanga infiam mi 200 chuang kal khawm ten intihsiakna an nei a ni.

Grassroots Sport Development Programme atan hian Samagra Shiksha Mizoram leh Sports Association 5 - Mizoram Boxing Association, Mizoram Badminton Association, Mizoram Football Association, Mizoram Weight-lifting Association leh Hockey Mizoram te nen thawhhona thuthlung ziah a lo ni tawh a. Samagra Shiksha Mizoram chuan Grassroots Level Sport Development Programme (GSDP) hnuaiah Mizoram hmun hrang hrangah Centre 40 a din a, sawrkar sikula kal naupang kum 6-14 inkar ten sports discipline hrang hrangah training an nei thin a. Training an neih thin atanga an thlen chin enfiahna leh an hmasawn dan tehna pakhat atan state pum huapin intihsiakna hi neih a ni.

Naupang zirna tibahlah lo tur zawngin kar khatah vawi hnih emaw, vawi thum emaw Training hi neihpui thin an ni a. An training-na atana mamawh bungrua bakah, naupang ten training tha tak an neih theihna turin centre tinah Trainer leh Asst Trainner dah vek an ni bawk.

State Level Competition  2023 thawhhnihna chu  Serchhip-ah Football, Thenzawl'ah Hockey  hmanga intihsiakna May thla tawp lam hian neih chhunzawm leh a ni ang.