477/2023-2024

Aizawl, the 17th May 2023: Governor Dr Hari Babu Kambhampati chuan Mizorama Beng tha lo leh ri hriatna lama harsatna tawk ten a thlawnna Beng dar(hearing aid) an dawn theihna turin Deen Dayal Sravana Foundation(DDSF) te a ko lut a. He hmalakna bawhzuina atan hian vawiin chawhhnu khan Raj Bhavan-ah Governor kaihruaina hnuaiah DDSF hotute leh Health Department bakah Social Welfare & Tribal Affairs Department official ten thawhho dan tur an sawi ho.

Governor Dr Hari Babu Kambhampati chuan Deen Dayal Sravana Foundation hmalakna tlangpui sawiin India hmun tam takah Beng lam harsatna nei te zawn chhuah leh a thlawna Hearing Aid pekchhuah kawnga hna ropui tak an thawk mek a ti. DDSF chuan Company lian tak te dawr kualin beng lama harsatna tawkte tan an mamawh Hearing Aid leh Device te leina tur Corporate Social Responsibility (CSF) Fund a hmuh sak thin a. Mizoramah pawh Beng lama harsatna nei tam tak an awm mek a, heng mi vanduai, tanpui ngai te hian a thlawna beng dar an neih theih na turin DDSF te chu an inhuam tih a sawi a ni.

Governor chuan DDSF te chuan a thlawna Bengdar pekchhuah an inhuam tih sawiin State Health Department leh SW&TA Department ten Beng dar vuah mamawhtu zawnchhuah kawngah an pui erawh a ngai tih a sawi a. He thawhhona hi harsatna a awm loh chuan a ranglama kalpui nghal theih a ni a. A thawhkhatna atan Zirlai LKG atanga College inkar te chu ngaih pawimawh a ni a, chhinchhiah bik ni se tha a tih thu a sawi bawk. Governor chuan Beng lama harsatna nei, screening hmachhawn ngai leh hearing aid mamawh te c harsatna nei pawhin State Nodal Officer, NPPCD hnenah in report se tha an tih thu a sawi bawk.

DDSF hotute chuan Beng dar vuah ngai te zawn chhuah kawngah state government in statistics mumul tak a neih sa chuan hun rei loteah hna a rawn thawk tan thei tih an sawi a. State Sawrkar lam atanga document an mamawh te chu screening report, aadhar leh ration card tih an tarlang a ni. A thawhkhatnaah Zirlaite te ngaih pawimawh hmasak ni se an duh thu an sawi a ni. Tuna Mizorama Beng thalo chhinchhiah te bakah district level-ah te pawh screening neih chhunzawm ni se tha an ti a ni.

Mizoram Sawrkar aiawh te chuan a thlawna Bengdar dawng duh leh Mamawh Mizoramah tam tak an awm mek tih an sawi a. District tinah deuh thawh Audiologist leh Audiometric Assistant te an awm a. Screening pawh kalpui thin niin tunah hian mi 100 chuang Hearing Aid mamawh an awm mek tih an sawi. Tuna an chhinchhiah zat aiin Beng dar mamawh an tam tih sawiin Screening pawh a hranpaa Camp buatsaihin a neih theih tih an sawi bawk.

DDSF aiawh hian Pu Ramanjaneyalu, chairman, deen dayal sravan foundation, NGO, Andhra Pradesh leh  a thawhpui Pu Thota venkata sarvarayudu, Independent Director, National fertilizers ltd, GOI te an thu a. Mizoram Sawrkar aiawhin Dr SR Lalchamliana, Jt Director (Planning), DHME, H&FW, Dr Robert L Khawlhring, SNO( NPPCD), Dr Lalthanmawii Khalthang, State Consultant(NPPCD &NPPC) Pi Caroline Hmingthanzuali, OSD, SW&TA, Pi Maria Lalnunmawii, State Consultant (RBSK) leh official dang te an thu thung.