Chief Minister Pu Lal Thanhawla chuan vawiin khan Durtlang-ah ICFAI University, Mizoram Campus in convocation vawi 3-na an neih a hmanpui.

Chief Minister chuan ICFAI University, Mizoram Campus in an convocation vawi 3-na a tel tura an sawmna leh thusawina hun an pe chu lawmthu a sawi a. He convocationa graduate tharte leh an nu leh pa te thawhrimna leh inpekna chu a fakawm hle a ni a ti a. ICFAI University leh a zirlaite hlawhtlinna thinlung lawmna chu a hlutpui thu a sawi a. Tha taka bul tanin, zirna ki hrang hrangah a tam zawng leh a tha zawnga duang taka a thang chho hi a lawmawm takmeuh a ni a ti a. Tunlaiah kan thalai thiamna tha tak tak neite tan zirna in sang zawk khawtlangin kan mamawhzia a rawn hre chho ve zel hi thil lawmawm a ni a ti a. Mihringte hriatna leh thiamna hi bituk chin siam lova a than duan chhoh zel hi a tul a ni a ti.

Chief Minister chuan hun lo la kal zel turah ICFAI University hi kan rama University tam takte zinga hmahruaitu leh khawvel pawha hnam hrang hrangte tana zirna in tha ala nih ngei hi ka tawngtaina a ni a ti a. Graduate thar zawng zawngte chu an thiamna leh hriatna te chu India ram tan leh a bikin Mizoram tan hmang thei se tih chu a duhthusam a ni a ti a. ‘In zirna line theuhah hlawhtlinna duhawm, hmasawnna lungpui leh kum zabi 21-na a hlawhtlinna thlentu ni thei turin duhsakna ka hlan a che u’ tiin Pu Hawla chuan graduate tharte leh University faculty zawng zawngte chu chibai a buk a ni.

ICFAI University, Mizoram Campus Vice Chancellor Prof. J.P.Ramappa chuan convocation an neih hmasak berah Chief Minister Pu Lal Thanhawla hian alo tel sak tawh avangin leh vawiin a vawi 3-na a tel sak leh avangin a chungah lawmthu a sawi a. Mizoram sorkarin ICFAI University din phalna a pek avang leh a thlawpna thuah lawmthu a sawi bawk a ni. An zirna in chu hna hmuh awlsam theihna lam hawia zirtirna pek thin a nih thu leh zirchhuak te tan hna an hmuh sak thin thu a sawi bawk a. An awmna hmun hi Durtlang Local Council remtihnaa an neih chungchangah leh a panna kawng chu ‘ICFAI Road’ tih hming put an phalsak thuah lawmthu a sawi bawk a ni.

Graduate thar zawng zawng, Under Graduate leh Post Graduate te hi an vaiin 88 an ni a, vawiina certificate dawng tura kal zawng zawng chu 54 an ni. Zirna ki hrang hrang MBA ah zirzo 9, BBA ah 18, Hospitality and Tourism Management ah 6 leh BCA ah 23 ten Vice Chancellor hnen atangin certificate an dawng a. Heng zirna hrang hrangah hian ti tha bik, zirzo 2 zel hnenah Gold Medal leh Silver Medal Chief Minister hnen atangin an dawng bawk a ni.

ICFAI University, Mizoram Campus hi Mizoram Legislative Assembly in kum 2006 khan din phalna alo passed tawh a. Central sorkar leh State sorkar atangin sum dawn neiloin ICFAI Society in hlawkna zawngloa a enkawl pumhlum a ni a. UGC Act 1956 section 22 hnuaiah degree pek theihna a nei a ni. ICFAI University hi India rama Private University groupte zinga lian ber pawl a ni a, hmun dang hrang hrang 10 ah an awm mek bawk a, chungte chu Hyderabad, Dehradun, Raipur, Jaipur, Ranchi, Baddi, Tripura, Nagaland, Meghalaya, Sikkim ah te a ni. Mizoram Campus zau zawng hi acres 17.58 a ni a, a building len zawng hi 43,000 sqft a ni. He University tan hian tun thleng hian ICFAI Societyin Rs.32 Crores a sengral tawh bawk a ni.