District Child Protection Unit, District Child Protection Committee leh District Legal Services Authority tangkawp buatsaihin vawiin khan Chhim Veng YMA Hall- Mamit Naupangte Ni hman a ni a. District Bawrhsap Pu K. Lalthawmmawia Chairperson District Child Protection Committee chuan khuallian niin a hmanpui.

He hun hmanpuitu Pu K. Lalthawmmawia, chuan naupangte Ni hmang tura kalkhawm zawng zawngte chibai a buk a, naupangte chu hlim tak leh lawm taka an nun an hman theih a duhsak thusawiin, mi zawng zawng hi Pathianin ama an puia duh taka a siam kan ni tiin in hmuhsit emaw in chhaihnawmnah emaw ching lo turin naupang kalkhawm te a chah a, naupangte chu an taksa ti chhe thei chin thalo chinglo tura in venga thinghlim taka nun hmang turin a fuih a ni.

Dr K. Lalrohlua, District Child Protection Officer (DCPO) pawhin thusawiin Children’s Day hi India rama Prime Minister hmasaber Jawaharlal Nehru piancham denchhena lawm thin a nih thu a sawi a, Mamit District chhunga an hmalak dan hrang hrangte sawiin kum kalta 2013-2014 chhungin CWC ah case 108 neiin kumin 2014 chhungin case 80 nei mekin, JJB ah kum 2013-2014 chhung khan case 30 neiin, kum 2014 chhungin case 30 an nei thute a tarlang a ni.

District Child Protection Unit Mamit District hi Social Welfare Department hnuaia awm niin kum 2012 atang khan Mamit ah an awm tan a ni. tunah hian thawktu mi 14 an awm mek a ni. Children’s Day pual hian tukin zing dar 5:30 khan Children’s Day Run buatsaih a ni a, Tin Mamit khawpui chhung zirnain hrang hrang a tangin Naupang kum 18 la tliang lote tan Painting/Poster Competition buatsaih a ni bawk a, naupang 266 competition ah hian an tel a ni, Children’s Day pual hian Mamit khawchhunga zirnain zawng zawngah Children’s Day Pledge leh thilpek pek vek an ni an ni bawk. Intihsiakna hrang hranga ti tha te hnenah hian Khuallian Pu K. Lalthawmmawian lawmman a hlan nghal a ni

Vawiin naupangte Ni hmanna hunah hian Mamit khawpui chhung Zirna in hrang hrang atangin naupang thahnem tak an tel a. Naupangten Intihlimna chi hrang hrang neiin hun an hmang a ni.