Vawiin khan Chief Minister Pu Lal Thanhawla chuan Indian Forest Service (IFS) in All India Service-a an kum 50 tlin lawmna puala programme IFS Mizoram Chapter ten State Forest Training Institute (SFTI), Bethlehem Vengthlang-a an buatsaih chu khuallian niin a hmanpui a. Hemi hma chhun dar 12:30 khan Chief Minister hian Environment, Forests & Climate Change Pisapui, Tuikhuahtlangah he ni hriatrengna lungphum ‘50th year of IFS Monument’ a hawng bawk a ni.

SFTI-a IFS kum 50 tlin lawmna puala programme ah hian Forest, Enviornment & Climate Change Minister Pu Lalrinmawia Ralte; School Education Minister leh Forest & Environment Minister lo ni tawh Pu H. Rohluna; bialtu MLA Pu R. Vanlalvena; Mizoram Sawrkara Forest Minister lo ni tawh leh PCCF lo ni tawh leh senior officer pension tawh engemaw zat an tel.

Chief Minister Pu Lal Thanhawla chuan kum 50 chungin nasa takin Indian Forest Service hnuaia thawk te chuan ram tan, a bik takin ramngaw, nungcha leh hengte humhalhna kawnga nasa taka thawkin an kaihhruaina hnuaia hmasawnna tam tak ram pumin a neih thu a sawi a. Mizorama Forests Department chu District Council hnuaiah tlawmte atanga bul tanin khatih laia thawktute inpekna leh thawhrimna avangin tun dinhmun hi a thleng a ni tiin Department tana lo thawk tawh zawng zawngte avangin he Department hi Department thang pawl tak leh hna thawk tha a ni theih phah a ni, a ti. IFS Mizoram Chapter te IFS kum 50 tlin lawmna programme rampuma state anga buatsaihtu hmasa ber an ni chu fakawm a tih thu a sawi bawk.

Chief Minister chuan Mahatma Gandhi a sawi khawvel a thil thlak danglam hmu turin mahni inthlak phawt a ngaih sawi chhawngin India anga ram thang mek leh Mizoram anga sawrkar hnathawk tamnaah thil an ti thei hle a chuvangin dik tak leh langtlang taka thawkin mipuite hlawkna leh hamthatna atan kan thawk tur a ni, a ti a. Sawrkar hnathawk te ko chunga mawhphurna lian tak a awm a, thil reng reng a tha lama hertu leh a thlen tirtu nih theuh kan tum a ngai a ni, a ti bawk.

NLUP chungchang sawiin Chief Minister NLUP hian ei leh bara intodelh leh mipuite te tan eizawnna ngelnghet siamsak piah bakah ramngaw siam that te, tuihna kang chat tawh siam that leh te leh kan chehvel boruak chhe mek siam that te a huam a, hemi avangin hian UNO pawhin tha tiin UN Joint Mission in Mizoram Sawrkar chu thawhpui mek a ni,a ti a. Forest Department te hma lakna thingphun leh enkawl zuina ani emaw, ram ngaw leh nungcha humhalh ani emaw, neitu rilru pua mipui ten an hmalakna te tihhlawhtlin nan theihtawp kan chhuah tlan a ngai, a ti a. Kan chhuan lokal zel turte hnenah chen tlak khawvel kan hnutchhiah theih nan Forest Department hmalakna te kan tawiawm leh hma kan lak pui a ngai a ni tiin Department a thawktu zawng zawng chu hetiang lama mipui zirtirna kawnga intuaithara nasa leh zawka hma la turin a chah bawk a ni.

IFS kum 50 tlin puala lehkhabu buatsaih Mini Coffee Table Book ‘MIZORAM FORESTS - through the year’ tih buatsaih chu Chief Minister hian a tlangzarh nghal a. He lawmna inkhawm ah hian Pi Lal Riliani chuan Environment, Forest & Climate Change department a Officer leh Field Staff mi pariat (8) hnenah an thawhthat avanga chawimawina (Citation of Honour) Department-in a buatsaih chu a hlan bawk a ni.

Inlawmna thu sawitu Environment,Forests & Climate Change Minister Pu Lalrinmawia Ralte chuan IFS in kum 50 a tlin chu hun chhinchhiahtlak tak anih thu sawiin Department a thawk te hnenah duhsakna a hlan a. A bik takin state pawn leh chhung atang a lo kal IFS Officer pension tawh te chu lo lawmin an hun lo kal zel tur atan duhsakna a hlan bawk a ni. Kum 50 chhung hi hun rei tak a nih avangin kha tih hun chhung a kan hnathawh leh hmasawn dan thlirletna hun remchang a ni tih a sawi bawk.

IFS Golden Jubilee lawmna programme hi Pu Lalram Thanga, Principal Secretary leh Principal Chief Conservator of Forests (PCCF) ni bawk chuan kaihruaiin India rama Forests humhalhna lo intan dan sawiin programme hmang a lo kal zawng zawngte hnenah duhsakna a hlan a. He hunah hian Pu C.P. Oberoi IFS(Retd.) in ngaihnawm takin ‘Nature Cure Healthy Living’ tih thupui hmangin thusawina a nei a. Forest officer boral ta te sunna hun hman a ni bawk.

He programme atan hian AGMUT Cadre-a IFS officer, Mizorama thawk mek ten an nikhat hlawh an thawh a ni.