No.5923/2020-2021

Aizawl 9.10.2020: Food, Civil Supplies and Consumer Affairs Department hnuaia Mizoram hmun hrang hranga ration buhfai dah lailawkna tur kudam, Intermediate Storage Godown sak zawh pakua hawnna inkhawm vawiin khan Mizoram Assembly Annexe Conference Hall-ah buatsaih a ni a. Chief Minister Pu Zoramthanga chu khuallian niin heng kudam pakua te hi a hawng a. FCS&CA Minister Pu K. Lalrinliana chu khualzahawm a ni. He inkhawmah hian Targeted Public Distribution System chungchang inhrilhhriatna leh inzirtirna hun Awareness Campaign neih nghal a ni.

Chief Minister chuan FCS&CA department in Mizoramin kan mamawh em em buhfai tha taka dah theihna turin kudam an siam chu lawmawm a ti a. Supply department ten hma la in an theihtawpin sawrkar laipuia an project siamin an buaipui dan leh, amah pawhin theih chin china bawhzui ngai te a bawhzui thu sawiin, kum 2019 February thla a sanction hmuh a nih hnu a chak taka hna an thawh danah FCS&CA department hmalakna chu fakawm a ti a ni. Chief Minister chuan mihirng tan chaw ei tur tlakchham a hlauhawm avanga sawrkar pawhin ei tur neilo an awm loh nana hmalak chu a ngaihpawimawh thu a sawi a. Covid avangin harsatna hrang hrang karah leh pawisa lama harsatna awm zingah pawh ei tur supply lamah chuan neih ang hman zel a ruahmanna siam zel a nih thu sawiin, Supply department thawktute pawh an hmalak zelna turah pawh buhfai leh ei leh bara inchhekkhawlna lamah harsatna awm hauh lo tura ngaihtuahna hmanga hma la chhunzawm zel turin a chah a ni.

Chief Minister chuan thu a sawi zel naah tuna Mizoram chhunga kudam kan lo neih zawng zawngte ah hian state pawn a tharchhuah buhfai deuh vek mai dah a nih hian tan kan lak tlan a tul thu a tilang a ni, a ti a. Leilet a siam theih hi hectare 70,000 chuang state in a neih thu sawiin, ruahtui duhthusam a tam leh lei tha tak kan neih te hi kan hman tangkai theih chuan Mizoram mipui chu a let tam taka chawm zo thei kan tharchhuak theih dawn a ni, tiin Chief Minister chuan state kan in todelh a kan hausakna tur a hman tangkai theih malsawmna kan dawn te hman tangkai chu sawrkarin a tum a nih thu a sawi a. Chumi tihlawhtling tur chuan mitinin pawimawhna an neih thu te, kalphung ngai ah chauh innghat lova ngaihtuahna thlakthleng leh kalphung thar siam a pawimawh thu a sawi a ni.

FCS&CA Minister Pu K. Lalrinliana chuan Chief Minister hmalakna in India sawrkarin CSS 2017-2020 hnuaiah Mizoram chhung hmun sawm (10) ah Intermediate Storage Godown sakna turin Grant-in-Aid atangin Rs. 19.22 crores, February, 2019 a hmuh tak hmanga vawiina kudam hawn takte hi sak a nih thu a sawi a. Chu sanction hmuh atang chuan Kolasib, Darlawn, Khuangleng, Darlung, Reiek, Khawlailung, Lawngtlai PDC, North Hlimen, Chawngte leh Maubawk ah kudam hi sak a ni hlawm a. Heng zingah hian Lawngtlai PDC chu a sakna tur hmunah harsatna a awm avangin sak hna tan lawk theih a nih loh avanga vawiin hian hawn ve hman a nih tak loh thu a sawi a ni. Lawngtlai PDC godown hi tun dinhmunah 30% zawh a ni tawh a. Minister chuan mipui mamawhna avangin hun reilote chhunga mipui mamawhna avanga sak hna thawktute chungah lawmthu a sawi a. Tuna kudam 10 sak bakah hian NABARD atangin 21 dang sakna tur dawn a nih thu leh hma la mek a nih thu a sawi a. Chung bakah chuan kudam 37 hmun hrang hranga sak a nih theih nan proposal siamin ruahman mek a nih thu a sawi bawk.

Go-down thar 10 avang hian Mizoramin storage capacity 4450 Metric Ton a neih belh phah dawn a. He hmalakna hnuaia godown 10 dawn hlawk zawng (storage capacity) chu Kolasib (750 MT), Darlawn (500 MT), Khuangleng (350 MT), Darlung (150 MT), Reiek (150 MT), Khawlailung (250 MT), Lawngtlai PDC (1000 MT), North Hlimen (150 MT), Chawngte (1000 MT) leh Maubawk (150 MT) an ni a. Kudam bakah hian infrastructure kaihhnawih – courtyard, approach road, toilet block leh staff quarters te sak tel a ni bawk.

Union Minister of Consumer Affairs, Food and Public Distribution fam ta Pu Ram Vilas Paswan sunna hun tawi hmanga programme tan a ni a. FCS&CA Secretary Pu Vanlalngaihsaka chuan programme hi kaihruaiin, Director Dr. Lalhriatzuali Ralte hnen atangin FCS&CA department hnathawh dan leh hmalakna hrang hrang bakah Targeted PDC chungchang ngaihthlak a ni a. FCS&CS Jt. Director Pu Laltanpuia hnen atangin kudam pakua chungchang report ngaihthlak niin, kudam sak hna thawktu Babie Construction & Consultancy Services (BCCS) atangin Project Engineer Er. Ramlianthanga hnen atangin technical report ngaihthlak a ni a, Addl. Director Pu C. Zasanga chuan lawmthu sawiin hun a khar a ni.

Sawrkar laipui leh state sawrkar tin ten One Nation One Ration Card (ONORC) nei tura hmalakna kal mek chungchang FCS&CA Deputy Director Pu V. Laldinsanga hnen atangin ngaihthlak a ni bawk a. Sawrkar laipuiin mi harsa zawkten awlsam zawka ei leh bar an hmuh theih nan India khua leh tui Ration Card nei te chuan ram chhung khawi hmunah pawh awm se an ration card neih sa hmanga ration an lak theihna tura ruahmanna a siam a ni a. Heihi Ration Card rawng eng leh rawng hring hmang ho te tana tih bik a ni rih a. Aadhar Card nen Ration Card thlunzawm ngei ngei a ngai a. Fair Price Shop internet signal nei tha bikte district tin atanga thlanchhuah tur a ni a. Inter-state portability (state leh state inkar) leh Intra-state portability (state khat chhunga district leh district) ah te hman theih niin, chenna hmun sawn te, hnathawh avanga hmun dana awmte leh awm hmun nget neilo a kal kual ngai te tana tangkai hle tur a ngaih a ni a. Intra-state portability hi 17th June, 2020 khan Mizoram chhunga hlawhtling taka test a ni a. Inter-state portability hi nei turin hmalak mek a ni. Ration card ah hian tuman an awm nawn (duplication) tur a ni lo a, Ration Card pakhatah member pakhat aia tam an awm chuan entitled quota 50% thleng chauh vawi khatah a lak theih.