No.5922/2020-2021

Vawiin khan Deputy Chief Minister Pu Tawnluia chu Aizawl Municipal Corporation huam chhunga ‘Best Performing Local Councils in Segregation of Waste-2020’ lawmman semna, Vanapa Hall-a neih-ah khuallian a ni a. AMC Mayor Pu PC Lalhmingthanga chu khualzahawm a ni.

Khuallian Pu Tawnluia chuan COVID-19 hri len kara Local Council Member kaltur bithliah lokal te chungah lawmthu a sawi a. Aizawl Veng hrang hranga mipui rawngbawl tura thlan tlin Local Council Member zawng zawng hnenah duhsakna a hlan a ni. Khuallian chuan tunhma chuan Aizawl khawpui tihfai leh bawlhhlawh thenfai hna hi Local Administration Department mawh a ni thin a, khawpui lo thang zelah Aizawl Municipal Corporation kan lo neih takah khan khawpui tih thianghlim leh bawlhhlawh paih leh sawngbawl chu AMC kutah, UD &PA Department te nen tang ho-in a lo tla ta a ni, a ti a. Aizawl khawpui thang zelah bawlhhlawh pawh a lo tam zel a, Solid Waste Management Act, 2016 tlawhchhanin bawlhhlawh thliar hran a lo ngai ta a, khawpui-ah mihring pawh kan lo changkang zel a, bawlhhlawh mumal taka thliar hran in tin-ah a lo ngai a, hemi kawngah hian Aizawl khawpui chhunga chhungtin ten a tharin tawih thei leh tawih theilo dah hran kawngah tan la thar leh ila, khawpui thianghlim leh fai-ah mihring an hrisel tih hre reng chungin thahnemngai takin kan ko-ah a awm tih i hre reng ang u, tiin a sawi.

Khuallian chuan Aizawl khawpui chhungah nitin bawlhhlawh (solide waste) matric tonne 140 vel nei ang kan ni a, heng sawngbawlna (solid waste management) hi hautak tak a ni a, bawlhhlawh, abikin tawih theilo kan ngah chuan kan chenna ti chhe thei –primary pollutants leh secondary pollutants level ti sangtu an nih theih avangin, bawlhhlawh ti tlem zawnga mitinin kan nunphung kan thlak chuan, khawvelin a buaipui em em ‘sik leh sa inthlak’ (climate change) zel tur vennaah ho te anga lang siin, kan tel ve tihna a ni, tiin a sawi.

Best Performing Local Councils in Segregation of Waste-2020 lawmman dawngtu te chu- pakhatna - College Veng Local Council, pahnihna - Chawnpui Local Council, pathumna - Upper Republic Local Council an ni.

Consolation Prize dawng Local Council panga an awm a, chungte chu- Khatla Local Council, Saron Veng Local Council, Dinthar Local Council, Armed Veng ‘S’ Local Council leh Bethlehem Veng Local Council te an ni.

Pakhatna hian Rs. 50,000; pahnihna Rs. 30,000 leh pathumna Rs.20,000 leh lawmpuina citation a keng tel teuh a ni. Consolation Prize hian Rs. 10000 leh lawmpuina citation a keng bawk a ni.

Deputy Chief Minister hi MLA Pu C.Lalmuanpuia, Deputy Mayor Pu Lalringliana, Councillor Pu R.Lalbiakthanga leh midangten an tawiawm a. He hun hi AMC Commissioner Pu K.Laldingliana’n a kaihruai a ni.