No.5924/2020-2021

Dated Champhai, the 9th October, 2020: Champhai District chhunga lirthei chevel leh mihring an him theihna tura Champhai District Magistrate-in September Ni 21, 2020 a thupek a lo chhuah tawh bawhzuina hmasa atan vawiin chawhnu khan  Road Protection Squad Committee Champhai chu an Chairman Pu Lalnunfela Chawngthu, Sub-Divisional Magistrate hovin an thawkchhuak a, kawngpui nekchep zawnga hmalaknate leh khawlaia inzuarte an endik.   

Road Protection Squad Committee Champhai hian Champhai khawpui luhka leh hmellanna pawimawh tak Kanan Veng kawngpui kam hrutin kawngpui nekchep leh hnawmhnawk siam hrang hrangte an endik a. Ngaihpawimawh lai awmte senghawia thianfai turin hriattirna an pe nghal zel a ni. He mi hnu hian khawlaia inzuar leh dawr bungrua kawng dala dahte Tuipui Bazar leh Dawr Veng a mite enfiah lehin, dan palzut mante chu insenghawi tirin ti tawhlo turin an hriattir nghal zel  a ni. 

Road Protection Squad Committee Champhai chuan vantlang tana hnawk leh kawngpui dal zawnga hmalakna leh hnawmhnawk siamte hnenah a rang lama seng hawi tura hriattirna pein a tul angina hma a la zel dawn a. A remchan dan ang zelin veng hrang hrangte fangin an endik zel dawn a ni.